ക മ ല )(* ക്ല ബ്

അമരംബലത്തെ മെഡിക്കല്‍ ക്യാമ്പ്

2011-12-15T13:53:00.000+05:30

നിലമ്പൂരില്‍ ഞങ്ങളുടെ ഹോം സ്പെഷ്യല്‍ സ്കൂളില്‍ വരുന്ന ശനിയാഴ്ച കമല ക്ലബ് നടത്തുന്ന മെഡിക്കല്‍ ക്യാമ്പിന്റെ പോസ്റ്റര്‍ ആണിത്. സാധാരണ ക്യാമ്പുകളില്‍ നടക്കുന്നതില്‍ നിന്നു വ്യത്യസ്തമായി ഓരോ കുട്ടിയെയും എല്ലാ കണ്‍സല്‍ട്ടന്റുകളും പരിശോധിച്ച് ഒരു മെഡിക്കല്‍ റെക്കോര്‍ഡ് ഉണ്ടാക്കി, ഭാവിയില്‍ സമാനമായ ക്യാമ്പുകള്‍ സംഘടിപ്പിച്ച് ഫോളോ അപ് ചെയ്യാനാണു പദ്ധതി.

മനോജ് രവി, കാര്‍ഡിയോളജിസ്റ്റ്,
രാകേഷ് ടീപി, ഇന്റേണല്‍ മെഡിസിന്‍,
രഘുനാഥ് ബി, പീഡിയാട്രിക്‍സ്,
ബിനേഷ് വി.ജി, ഡെര്‍മറ്റോളജി,
രാജേഷ് കെ.പി, ഇ.എന്‍.ടി,
ഗോപാല്‍ കെ ആര്‍, റേഡിയോളജി,
മനോജ് കെ.ടി, മനോജ് ടി.വി, ഞാന്‍, പ്രിലിമിനറി സ്ക്രീനിങ്
എന്നിങ്ങനെയാണ് ഡോക്ടര്‍‌മാര്‍.

ശനിയാഴ്ച ഉച്ചക്ക് നിങ്ങള്‍ ഫ്രീ ആണെങ്കില്‍ കമല ക്ലബിലേക്ക് വരൂ...

സൈലന്റ് വാലി: എ റെയ്‌ന്‍ ട്രാവെലോഗ് (എഡിറ്റഡ് റീപോസ്റ്റ്)

2011-09-25T16:07:00.004+05:30

കമല ക്ലബ് കൂടിയിട്ട് നാളുകളേറെയായി, കാപ്പാട് ബീച്ചില്‍ നേരം വെളുപ്പിച്ചതിന്റെ ഓര്‍മ്മയൊക്കെ തികട്ടിത്തുടങ്ങിയെന്നൊക്കെപ്പറഞ്ഞ് ബിനേഷ് വിളിക്കാന്‍ തുടങ്ങിയിരുന്നുവെങ്കിലും മനോജ് രവി ശിരുവാണിയില്‍ പട്ടിയാര്‍ ബംഗ്ലാവ് ബുക്കു ചെയ്തുകഴിയുമ്പോഴാണ് കാര്യങ്ങള്‍ ട്രാക്കിലാവുന്നത്.

ദിവസവും രാവിലെ അവനയക്കുന്ന കൗണ്ട് ഡൗണ്‍ മെസ്സേജുകള്‍ ശല്യമായിത്തുടങ്ങിയപ്പോഴേക്കും വെള്ളിയാഴ്ചയായി. കറന്റും വെള്ളവുമൊന്നും ഉണ്ടാവില്ല, മുടിഞ്ഞ മഴയായിരിക്കും, തണുത്തകാറ്റത്ത് വിറങ്ങലിച്ച് മൂഡൗട്ടാവുമായിരിക്കും എന്നൊക്കെയാണ് ട്രാവലോഗുകളില്‍ കണ്ടത്. അതുവരെ, ചെറിയ മക്കളെ ഈ മഴക്കാലത്ത് വിട്ട്, പോവുന്നില്ലെന്നു വച്ച എനിക്കു പോലും ക്ലബ്ബല്ലേ, പോവാതിരിക്കുന്നതെങ്ങനെ എന്നു തോന്നിത്തുടങ്ങിയപ്പോഴേക്കും അറിയിപ്പു വരുന്നു, മന്ത്രിക്കു വേണ്ടി ബുക്കിങ്ങ് മാറ്റപ്പെട്ടു, പകരം മുക്കാളി ഐബിയില്‍ മുറി ഒരുക്കിയിരിക്കുന്നുവെന്ന്.
സുനുവുമൊത്ത് ഫോക്കസ് മാളില്‍ ക്ലബ്ബിനുവേണ്ടി ഒരു 'അഡ്ജസ്റ്റ്മെന്റ് ഷോപ്പിങ്ങ്' നടത്തിക്കൊണ്ടിരിക്കുമ്പോഴാണ് മെസ്സേജ് വരുന്നത്, വായിച്ചുകഴിഞ്ഞതും വാലറ്റ് കാലിയായെന്നു പ്രത്യേകം പറയേണ്ടല്ലോ! അല്ലെങ്കില്‍ത്തന്നെ അവള്‍ വശപ്പിശക് മണത്തറിഞ്ഞ മട്ടായിരുന്നു താനും!

സൈലന്റ് വാലി യാത്ര പലപ്പോഴായി മാറ്റി വയ്ക്കപ്പെട്ട ഒരു കടമാണെനിക്ക്. പഠിക്കുമ്പോഴും, ഹൗസ് സര്‍ജന്‍സിക്കാലത്തും, പിന്നീടു വന്ന ട്രിപ്പുകളിലൊക്കെയും ഓങ്ങുമ്പോഴേയ്ക്കും, കൈയില്‍ നിന്നുമൂര്‍ന്നു പോയ വഴുക്കല്‍ പിടിച്ച ഒരു കല്ലു പോലെ, മാറിപ്പോയ ഒരു യാത്ര. തന്നെക്കൂട്ടാതെ പോവുന്നതില്‍ ചെറിയ വിഷമങ്ങളൊക്കെ കാണിച്ചെങ്കിലും സുനു പാക്കിങ്ങ് ഭംഗിയാക്കി; ചാര്‍ജറുകളും സോക്ക്സും മറ്റുമൊക്കെ വിട്ടുപോവാതെത്തന്നെ. ജൂലൈ ഇരുപത്തിമൂന്നിന് ഉച്ചയൂണു കഴിഞ്ഞ് മൂന്നേ കാലോടെ ഓഡോമീറ്റര്‍ സെറ്റ് ചെയ്ത് ഇന്നോവയില്‍ കുതിപ്പു തുടങ്ങി. മഴയത്ത് താമരശ്ശേരി ചുരമിറങ്ങുമ്പോള്‍ ടീപിയുടെ കോള്‍, ഗോപാലിന്റെ മാരുതി വേഴ്സയില്‍ ടീം ഷൊര്‍ണൂര്‍ എത്താറായെന്ന്‍. സ്കൂള്‍ വിടുന്ന സമയമായതുകൊണ്ടും കനത്ത മഴ കാരണവും മണിക്കൂറില്‍ അന്‍പത് കിലോമീറ്ററാണ് എന്റെ സ്പീഡ്, മണ്ണാര്‍ക്കാട് വച്ച് കാണാമെന്നാണ് പ്ലാന്‍. സംസാരത്തിനിടെ പൊട്ടിച്ചിരികളും അലര്‍ച്ചയുമൊക്കെ പശ്ചാത്തലത്തില്‍ കേട്ടത് ഒറ്റയ്ക്ക് ഡ്രൈവുചെയ്യുന്ന എന്നെ ഒട്ടൊന്നുമല്ല വിഷണ്ണനാക്കിയത്. യാത്രകളുടെ രസം കൂട്ടായ്മയുടേതാണെന്ന് കോഴ്സ് കഴിഞ്ഞ് ഇത്ര വര്‍ഷങ്ങള്‍ കഴിഞ്ഞും ഇടയ്ക്കിടെ കൂടുന്ന കമലകളിലൊരാള്‍ക്ക് പറഞ്ഞുതരേണ്ടതില്ലല്ലോ. താമരശ്ശേരി, മുക്കം, അരീക്കോട് വഴി മഞ്ചേരിയും പാണ്ടിക്കാട്, മേലാറ്റൂര്‍, അലനല്ലൂര്‍ വഴി മണ്ണാര്‍ക്കാടും നൂറ്റിയിരുപത് കിലോമീറ്റര്‍ രണ്ടര മണിക്കൂറില്‍ ഓടിയെത്തിയ എന്നെ നിരാശനാക്കിക്കൊണ്ട്, കാത്തു നില്‍ക്കാതെ, അവര്‍ ചുരം കയറിത്തുടങ്ങിയിരിക്കുന്നു!
രണ്ടു വര്‍ഷത്തിന്റെ ഇടവേളയില്‍, ജൂലൈമാസം, രണ്ടു പേരാണ് ഞങ്ങളുടെ ബാച്ചില്‍ മരണമടഞ്ഞത്. വെരിക്കോസ് വെയിന്‍ അബ്ലേഷന്‍ കഴിഞ്ഞ് പള്‍മണറി എംബോളിസം വന്ന് കോട്ടയം മെഡിക്കല്‍ കോളേജിലെ അനസ്തീഷ്യോളജിസ്റ്റായിരുന്ന ദീപക് ഹര്‍ഷന്‍ ആദ്യവും വന്‍‌കുടലിലെ കാന്‍സര്‍ വന്ന് പെരിന്തല്‍മണ്ണയിലെ പ്രമുഖ ഓര്‍ത്തോപീഡീഷ്യനായ നസറുദ്ധീന്‍ ഇപ്പോഴും. കഴിഞ്ഞ കുറേ നാളുകളായി മരണം, ആശ്രിതരുടെ 'മരണാനന്തര' ജീവിതം തുടങ്ങിയവ ഞങ്ങളുടെ സംഭാഷണങ്ങളില്‍ പതിവായിരുന്നതിനാല്‍, ആര്‍ക്കും ആരുടെയും കാത്തിരിപ്പു തുണയാവില്ലെന്നും, യു ആര്‍ എലൈവ് ആസ് ലോങ് ആസ് യു ലിവ് എന്നുമൊക്കെ മനസ്സില്‍ പറഞ്ഞു ഞാന്‍ ഫിലോസഫിക്കല്‍ ആവാന്‍ ശ്രമിച്ചു. പണ്ടെപ്പോഴോ റൈറ്റ് ചെയ്തു വച്ച സിഡിയില്‍ കൈലാഷ് ഖേറിന്റെ അഭൗമ ശബ്ദത്തില്‍ നീഹര്‍‌വ എന്ന കബീറിന്റെ വരികള്‍ കൂടിയായപ്പോഴേയ്ക്കും ഇനി ഇരുട്ടും മുന്‍പ് കാഴ്ചകള്‍ കണ്ടു രസിച്ചു മതി യാത്രയെന്നും തീരുമാനിച്ച് വേഗം കുറച്ചു.
ഇടത്തോട്ട് സൈലന്റ് വാലിയിലേക്കുള്ള റോഡില്‍ കുറച്ചു ചെന്നപ്പോഴേക്കും ദൂരെ ആകാശത്തെ വെല്ലുവിളിച്ചുകൊണ്ട് ഉയര്‍ന്നു നില്‍ക്കുന്ന കൂറ്റന്‍ കല്ലുമല. തെറിച്ചു നില്‍ക്കുന്ന അതിന്റെ തലപ്പ് കോടയില്‍ മറഞ്ഞിരിക്കുന്നു.
ചാറ്റല്‍ മഴയെ വകവയ്ക്കാതെ ചില്ലു താഴ്ത്തി മണങ്ങള്‍ ശ്വസിച്ചുകൊണ്ട് അലസമായ ഒരു യാത്ര. സുനുവിനെയും ഗൗതത്തെയും അമേയയെയും ഒപ്പം കൂട്ടിയിരുന്നെങ്കില്‍ എന്നു പലതവണ തോന്നിപ്പോവുന്ന പച്ചപ്പിന്റെ കാഴ്ചകള്‍, കോടമഞ്ഞിന്റെ ഒളിച്ചു കളികള്‍, അരുവികള്‍ കല്ലില്‍ കുത്തിയൊഴുകുന്നതിന്റെ അലയൊലികള്‍. വയനാടന്‍ ചുരത്തേക്കാള്‍ എത്രയോ മെച്ചപ്പെട്ട റോഡ്. ഇടയ്ക്കിടെ അലോസരപ്പെടുത്തിക്കൊണ്ട് ഹോണ്‍ മുഴക്കിക്കൊണ്ടിരുന്ന ഒരു അഗളി ബസ്സു കടന്നു പോയതോടെ ചുരത്തില്‍ ചീവീടുകളുടെ ശബ്ദം മാത്രം.

ആറരയ്ക്ക് മുക്കാളി ഐബിയിലെത്തുമ്പോള്‍ ചാറ്റല്‍ മഴ നിന്നിരുന്നു. മുറ്റത്തുള്ള ഔഷധ സസ്യത്തോട്ടത്തില്‍ ഇതുവരെ കാണാത്ത ചെടികള്‍ സം‌രക്ഷിക്കപ്പെട്ടിരിക്കുന്നു.
നേരെ ഒതുക്കുകളിറങ്ങിച്ചെല്ലുമ്പോള്‍ സന്ധ്യയുടെ നേര്‍ത്ത വെളിച്ചത്തില്‍ അലകളിളക്കിക്കൊണ്ട് ഭവാനിപ്പുഴ കുതിച്ചൊഴുകുന്നു. ഉന്മത്തമാകുന്ന കാഴ്ചയാണെങ്കിലും, നുരഞ്ഞൊഴുകുന്ന നദിയുടെ ഞൊറികള്‍ക്കിടയില്‍ അപകടം നഖങ്ങളൊളിപ്പിച്ച് പതിയിരിക്കുന്നുവെന്നതോര്‍ത്തപ്പോള്‍ നടുക്കം. കൂടുതല്‍ നേരം നിന്നാല്‍ നദിയുടെ കൈകള്‍ കരയോളം വന്ന് എന്നെ ആലിംഗനം ചെയ്തേക്കുമെന്നും വിവശനായി ഞാന്‍ വീണുപോയേക്കുമെന്നും തോന്നിയപ്പോള്‍ കയറിപ്പോന്നു.
വരാന്തയില്‍ എത്തുമ്പോഴേയ്ക്കും ചിരിയുടെ ചില്ലുകള്‍ വീണുടയുന്ന ശബ്ദം. ക്ലബ്ബ് ഔദ്യോഗികമായി ചേര്‍ന്നിരിക്കുന്നു. ബാഗുകള്‍ ഇറക്കുമ്പോഴേയ്കും ചൂടു ചായ കിട്ടിയത് യാത്രാച്ചൊരുക്ക് ഒഴിയാന്‍ സഹായിച്ചു. പതിനഞ്ച് വര്‍ഷമായി ഡെയിലി വേജസ് ബേസിസില്‍ ജോലി ചെയ്യുന്ന ഒരാളായിരുന്നു കുക്ക്. കുന്തിയെന്ന പേരുള്ള മുറിയും മുകളിലെ ഡോര്‍മെട്രിയുമാണ് താമസത്തിന്. ഭവാനിയെന്ന തൊട്ടടുത്ത മുറിയില്‍ വാര്‍ഡന്‍, വേറെയൊരു കുടുംബം കൂടിയുണ്ട് അപ്പുറത്ത് താമസക്കാരായി.

ബാല്‍ക്കണിയില്‍ മനോജുമൊത്ത് നിന്നപ്പോള്‍ ഇരുട്ടത്ത് കൂടണയാന്‍ വെമ്പിപ്പറന്ന കിളികള്‍ വൃക്ഷത്തലപ്പില്‍ അദൃശ്യരാവുന്നതും വൈകിയതിന് നിര്‍‌വികാരതയോടെ വൃക്ഷം തലകുലുക്കി ശാസിക്കുന്നതും കണ്ടു.
ഭക്ഷണം കഴിച്ച് ദീപക്കിനെയും ഹോജയെയും അനുസ്മരിച്ച് കുറച്ചു നേരം. മരണവും അതിന്റെ സൈഡ് ഇഫക്റ്റുകളും പ്രബന്ധമായി. നിസ്വാര്‍ഥമായ ജീവകാരുണ്യപ്രവര്‍ത്തനങ്ങള്‍ക്കിടെ കെ.ടിയെ അലോസരപ്പെടുത്തുന്ന നെറികെട്ട ക്യാമ്പെയ്‌നുകള്‍ രോഷത്തോടെ ചര്‍ച്ച ചെയ്യപ്പെട്ടു. ചെടിപ്പു മാറ്റാന്‍ ടീപിയും രഘുവും ടീവിയും ഗോപാലും പാട്ടുകള്‍ പാടിത്തുടങ്ങി. തിലകനും മൂന്നാം പക്കവും നഖക്ഷതങ്ങളും ഇളയരാജയും പദ്മരാജനുമെല്ലാം നിറഞ്ഞ രാത്രി. താളവുമായി ബിനേഷും കെ.പിയും.
ഇടയ്ക്ക് മനോജ് ആതിഥേയനായ കുഞ്ഞച്ചന്‍ ചേട്ടനോട് രാവിലെ വാലിയിലേക്കുള്ള യാത്രയുടെ വിശദാംശങ്ങള്‍ ആരായാന്‍ പോയതൊഴിച്ചാല്‍ രാത്രി കമല ക്ലബ്ബ് അതിന്റെ എല്ലാ പ്രതാപങ്ങളോടെയും ആഘോഷമാക്കി മാറ്റി. പുഴയുടെ ഇരമ്പലും ചീവീടുകളും ഇലച്ചാര്‍ത്തുകളില്‍ ഇടയ്ക്കു ചിന്നുന്ന നനുത്ത മഴയും കാലം തെറ്റി പൂത്ത കാട്ടുചെമ്പകത്തിന്റെ മാദക ഗന്ധവും...അവിസ്മരണീയമായ മറ്റൊരു രാത്രി കൂടി.
സൈലന്റ് വാലിയില്‍ എട്ടുമണിക്കാണ് ഔദ്യോഗിക പ്രവേശമെങ്കിലും, നേരത്തെ പോയാല്‍ മാത്രമേ മൃഗങ്ങളെ കാണാന്‍ പറ്റൂവെന്നതിനാല്‍ ഏഴുമണിക്ക് തന്നെ എഴുന്നേറ്റു.

തെളിഞ്ഞ പ്രഭാതം, മുറ്റത്തെ മരത്തലപ്പുകളില്‍ക്കൂടി ഉദയസൂര്യന്റെ വജ്രകിരണങ്ങള്‍ ഭൂമിയെത്തിരഞ്ഞു നടക്കുന്നു. രാത്രി മലയില്‍ മഴ കുറഞ്ഞതുകൊണ്ടാവണം, ശബ്ദം കുറച്ച് ഭവാനിപ്പുഴ ഉല്ലസിച്ചൊഴുകുകയാണ്. തോര്‍ച്ചയില്‍ തേന്‍ തേടി പുള്ളിപ്പൂമ്പാറ്റകള്‍ പൂക്കളിലേയ്ക്ക്. സൂര്യനു പുറം തിരിഞ്ഞ് ധൃതിയില്‍ വലനെയ്ത് ഇരയെക്കാത്തിരിക്കുന്ന ഒരു വരയന്‍ ചിലന്തി.. വിശുദ്ധമായ മണങ്ങള്‍; മണ്ണിന്റെ, മരത്തിന്റെ, കാറ്റിന്റെ.... വശ്യമായ വന്യത.

എട്ടരയോടെ ജീപ്പു വന്നു. കെ.പി നീലേശ്വരത്തേക്കു ബുക്കുചെയ്തിട്ടുള്ള ട്രെയിന്‍ കിട്ടില്ലായെന്നു പറഞ്ഞ് ഒഴിവായി. ആവത് പരിശ്രമിച്ചിട്ടും തീരുമാനത്തില്‍ നിന്നും പിറകോട്ടില്ല ചങ്ങാതി. എത്രയോ ട്രെയിനുകള്‍ എത്രയെത്ര സ്റ്റേഷനുകളിലൂടെ ഓടിപ്പോയിരിക്കുന്നു. നമ്മുടെ പാളത്തില്‍ ഇന്നുള്ളത് ഒരു അസുലഭ വണ്ടിയല്ലേ; ഒറ്റപ്പാളങ്ങലിലൂടെ കമല ക്ലബ്ബ് എത്ര ഓടിയിരിക്കുന്നുവെങ്കിലും അവനോര്‍ക്കാമായിരുന്നു!
ഫോറസ്റ്റ് ഓഫീസില്‍ എല്ലാവരും പേരെഴുതി ഒപ്പിട്ടു. ഫീസ് കുഞ്ഞച്ചന്‍ ചേട്ടന്‍ കൊടുത്തിരിക്കുന്നു. ജീപ്പില്‍ കയറുമ്പോള്‍ ഗൈഡ് സന്തോഷ്, മുക്കാളിയില്‍ വെയിലാണെങ്കിലും സൈലന്റ് വാലി കോര്‍ സോണില്‍ മഴയായിരിക്കുമെന്നു തറപ്പിച്ചു പറഞ്ഞത് ഒട്ടൊന്നു വിഷമപ്പെടുത്തി. മുന്‍പില്‍ വേറെ ജീപ്പുകള്‍ പോയിക്കഴിഞ്ഞ സ്ഥിതിക്ക് മൃഗങ്ങളെ കാണാന്‍ സാധ്യതയുമില്ലത്രെ.

കുറച്ചിട ചെന്നപ്പോള്‍ സൈലന്റ് വാലിയിലേക്കുള്ള പ്രവേശന കവാടത്തിലെത്തി.അനുമതി ലഭിച്ചു കഴിഞ്ഞ് വാലിയിലേക്കുള്ള യാത്ര തുടങ്ങി; ഗിരിജന്‍ സൊസൈറ്റിയുടെ പ്രവര്‍ത്തന മേഖലയിലൂടെ, മെറ്റല്‍ റോഡിലൂടെ കയറ്റങ്ങള്‍, വളവുകള്‍. വൈത്തിരി സുഗന്ധഗിരിയിലെന്ന പോലെ, കുരുമുളകും കാപ്പിയും ഏലവും കൃഷിയിറക്കി ആദിവാസികള്‍ വസിക്കുന്ന ഇടം. താഴ്വരയില്‍ അഹാഡ്സ് നിര്‍മ്മിച്ച കോണ്‍ക്രീറ്റ് വീടുകള്‍. ചിലയിടങ്ങളില്‍ സൗരോര്‍ജ്ജ വൈദ്യുത വേലികള്‍. മുമ്പവിടെ ആനയിറങ്ങി ഒരാളെ ചവിട്ടിക്കൊന്നതിന്റെ പ്രതിഷേധം കാരണമാണ് കമ്പിവേലികള്‍ സ്ഥാപിച്ചതത്രെ. വയനാട്ടിലെ കൃഷിയിടങ്ങളിലെ വൈദ്യുത വേലി ആനകള്‍ എത്രയോ വട്ടം ചവിട്ടിപ്പൊളിച്ചിരിക്കുന്നുവെന്ന് പുഞ്ചിരിയോടെ മനസ്സിലോര്‍ത്തു.

ഇടയ്ക്ക് താഴ്‌വാരങ്ങളില്‍ വൃക്ഷത്തലപ്പുകളില്‍ പക്ഷിക്കൂട്ടങ്ങളുടെ ചിലപ്പുകള്‍.

കൃഷിയിടങ്ങള്‍ കഴിഞ്ഞ് കയറ്റം തുടങ്ങിയപ്പോഴെയ്ക്കും മഴ ചാറിത്തുടങ്ങി. തണുപ്പേറുന്നു, കോടയില്‍ മുങ്ങിയ വഴി. കാടിനു കനം വച്ചു വരുന്നു.

ഇടയില്‍ വഴിയരികില്‍ ഒരു വെള്ളച്ചാട്ടം കണ്ടപ്പോള്‍ മഴ വകവയ്ക്കാതെ ഒരു ഫോട്ടോ സെഷന്‍. ജീപ്പില്‍ തിരികെക്കയറിയപ്പോള്‍ പാന്റിലും കാലിലും തൂങ്ങിപ്പിടിച്ച് അതിഥിയാത്രക്കാര്‍: അട്ടകള്‍. യാത്ര പ്ലാന്‍ ചെയ്തപ്പോഴേ മനോജാണ് പുകയിലയും ഉപ്പും കൊണ്ടുവരാമെന്നേറ്റത്. ഏറ്റതല്ലേ, അദ്ദേഹമത് കൊണ്ടുവരികയും സെയ്ഫായി കാറില്‍ വയ്ക്കുകയും ചെയ്തിട്ടുണ്ട്; മുക്കാളിയില്‍! ചിരികള്‍, കുടച്ചിലുകള്‍, സീല്‍ക്കാരങ്ങള്‍, അട്ടകളുടെയും കമലകളുടെയും. അട്ടഹാസമെന്നതിന് രഘുവിന്റെ പുതിയ നിര്‍‌വചനം: തടിച്ചൊരു ഞരമ്പിനടുത്ത് ഇടം കിട്ടിയ അട്ടയുടെ ചുണ്ടില്‍ വിരിയുന്ന മൃദു മന്ദഹാസമാണു പോല്‍, അട്ട'ഹാസം'!

കുറച്ചിട ചെന്നപ്പോള്‍ മരത്തലപ്പുകളില്‍ ഒരു മിന്നായം. നിര്‍ത്തിയിറങ്ങിയപ്പോഴേയ്ക്കും ഒരു സിംഹവാലന്‍, നിഴല്‍ പോലെ, അകലെയെത്തിയിരിക്കുന്നു. ചക്കപോലെയുള്ള ഒരു കായുണ്ടാവുന്ന മരങ്ങള്‍. വര്‍ഷങ്ങള്‍ക്കു മുന്‍പ് വീണുപോയ ഒരു വന്‍മരം കേടുപാടുകളൊന്നും കൂടാതെ വഴിയരികില്‍ കിടക്കുന്നു. സ്വാഭാവികമായ വനവും ആവാസ വ്യവസ്ഥയുമാണ് പരിരക്ഷിക്കപ്പെടുന്നതെന്ന് ഗൈഡ്. വനവല്‍ക്കരണമല്ല, വന സം‌രക്ഷണമാണ് സൈലന്റ് വാലിയാകെ.

മുന്നില്‍ വഴിയുടെ വശങ്ങളില്‍ പുല്ലുകള്‍ വളര്‍ന്നയിടത്ത് വണ്ടി നിര്‍ത്തി സന്തോഷ് പുറത്തിറങ്ങി. ഒച്ചയുണ്ടാക്കരുത്, മൃഗങ്ങള്‍ ഓടിയകലുമെന്നു മുന്നറിയിപ്പോടെ. പതുക്കെ നടന്ന് ഒരു മരത്തിനടുത്തെത്തിയപ്പോള്‍ ഒരു സിംഹ വാലനും അടുത്ത മരത്തില്‍ കരിങ്കുരങ്ങുകളുടെ കൂട്ടവും.

മഴ വകവയ്ക്കാതെ ക്യാമറ ഉയര്‍ത്തിയപ്പോഴെക്കും ജീപ്പിനടുത്തുനിന്നും ടീപിയുടെ ദീനരോദനവും രഘുവിന്റെ പൊട്ടിച്ചിരിയും: പുല്‍ത്തലപ്പുകളില്‍ നിന്നും അട്ടകള്‍ കഴുത്തു തിരഞ്ഞു വരുന്നത്രെ. തിരിഞ്ഞു നോക്കി വീണ്ടും ഫോക്കസ് ചെയ്യുമ്പോഴേയ്ക്കും ശബ്ദം കേട്ട് കുരങ്ങുകള്‍ ഉള്ക്കാട്ടിലേക്കു വലിഞ്ഞു കളഞ്ഞു. കാണാനൊത്തതിന്റെ സന്തോഷം, പകര്‍ത്താനാവാത്തതിന്റെ ഇച്ഛാഭംഗം!

കോര്‍ സോണിലേക്കുള്ള കവാടം കോടമഞ്ഞില്‍ മുങ്ങിയിരിക്കുന്നു. വേനലിലായിരുന്നെങ്കില്‍ ഒന്നര കിലോമീറ്റര്‍ കൂടി ഉള്ളിലേയ്ക്കു പോവാമായിരുന്നുവെന്ന് ഗൈഡ്. മഴക്കാലത്ത് മഞ്ഞില്‍ പതുങ്ങിയിരിക്കുന്ന ഒറ്റയാന്മാര്‍ ഒഴിയാന്‍ ഇടതരാതെ ആക്രമിച്ചേക്കുമെന്നതിനാല്‍ പുഴവരെയും അതിലുള്ള തൂക്കുപാലം വരെയും പെര്‍‌മിഷന്‍ ഇല്ലത്രെ.

സൈരന്ധ്രിയിലെ വാച്ച് ടവര്‍ എത്തിയപ്പോഴേയ്ക്കും മഴ തോര്‍ന്നിരിക്കുന്നു . തെളിച്ചം കുറവെങ്കിലും പ്രകൃതി കനിഞ്ഞിരിക്കുന്നു. മനോജും ഗോപാലും കിതച്ചുകൊണ്ട് ഞാനും മുകള്‍ വരെ കയറി. ബാക്കിയുള്ളവര്‍ പാതിയില്‍ നിര്‍ത്തി.
ജീവിതത്തില്‍ കണ്ടതിലേറ്റവും മനോഹരമായ പ്രകൃതി ദൃശ്യം കണ്‍‌മുന്നില്‍. നാലു ചുറ്റിലും പച്ചപ്പിന്റെ പ്രളയം.
തെളിഞ്ഞും കോടയില്‍ മറഞ്ഞും മലനിരകള്‍..
തണുത്ത് ശക്തിയേറിയതെങ്കിലും വിശുദ്ധിയുടെ ഗന്ധമുള്ള കാറ്റ്.
മലയിടുപ്പുകള്‍ക്കിടയില്‍ ഒരു വെള്ളിനൂലു പോല്‍
കുന്തിപ്പുഴ ഒഴുക്കു തുടങ്ങുന്നത് മഞ്ഞില്‍പ്പുതഞ്ഞു കാണാം..
നിര്‍ന്നിമേഷരായി നോക്കിക്കൊണ്ടു നില്‍ക്കേ, മഴവരുന്നതുപോലെ
കോടയിറങ്ങി ഞങ്ങളെപ്പൊതിഞ്ഞു.
മഞ്ഞിന്റെ ആശ്ലേഷണത്തില്‍ മനം നിറഞ്ഞ്, സര്‍‌വവും വിസ്മരിച്ച്, തുള്ളിച്ചാടിക്കൊണ്ട് മനോജ്.
കാറ്റിന്റെ ശക്തിയിലോ, മനസ്സിന്റെ ലഘുത്വത്തിലോ
പൊങ്ങിപ്പോവുന്നുവെന്ന തോന്നല്‍....

അവിസ്മരണീയമായ കാഴ്ചനിമിഷങ്ങള്‍..

അപാരമായ പ്രകൃതിയുടെ മുന്‍പില്‍ വിനീതനായി ഏതു മനുഷ്യനും ഒരു വേള ധ്യാനനിമഗ്നനായിപ്പോവും.

എങ്കിലും ലൗകിക ജീവിതത്തിന്റെ രാവണന്‍ കോട്ടയില്‍ നിന്നും ഏറെ പുറത്തല്ല ഞങ്ങളെന്നോര്‍മ്മിപ്പിച്ചു കൊണ്ട് എപ്പോഴോ മനോജിന്റെ ബ്ലാക്ക് ബെറി ശബ്ദിച്ചു. ആഞ്ജിയോപ്ലാസ്റ്റി കഴിഞ്ഞ ഏതോ ഒരു മനുഷ്യന്റെ കുഴഞ്ഞു മറിഞ്ഞ ഹൃദയതാളങ്ങള്‍ മനോജിനെ കാഴ്ചകളില്‍ നിന്നു വേര്‍പെടുത്തി.
ദൃശ്യമെന്നതു പോലെ കാഴ്ചയെന്നതും ആപേക്ഷികം.
പങ്കിട്ട നിമിഷങ്ങള്‍ക്ക് എത്ര പ്രസക്തിയുണ്ട്?
പ്രകൃതിയുടെ അപാരതയെ തിരസ്കരിച്ച കെ.പിയ്ക്ക് നഷ്ടമായതെന്തെന്ന്‍
എങ്ങനെ പറഞ്ഞു മനസ്സിലാക്കും?

ടവറിന്റെ പാതി വഴിയില്‍ന്‍ തങ്ങി ഇറങ്ങിപ്പോയ നാലുപേരേക്കാള്‍
കൂടുതല്‍ ഞങ്ങളെന്തു നേടി?

ഞാനാര്, നിങ്ങളാര് ?
മരണശേഷം അവശേഷിപ്പിച്ചു പോവുന്നതു മാത്രമാണോ ജീവിതമെന്നത്?

സൈലന്റ് വാലി: ഒരു മഴ യാത്ര..പാര്‍ട്ട് മൂന്ന്

2011-07-31T09:30:00.023+05:30

സൈരന്ധ്രിയിലെ വാച്ച് ടവര്‍ എത്തിയപ്പോഴേയ്ക്കും മഴ തോര്‍ന്നു .
തെളിച്ചം കുറവെങ്കിലും പ്രകൃതി കനിഞ്ഞിരിക്കുന്നു. മനോജും ഗോപാലും കിതച്ചുകൊണ്ട് ഞാനും മുകള്‍ വരെ കയറി. ബാക്കിയുള്ളവര്‍ പാതിയില്‍ നിര്‍ത്തി.
ജീവിതത്തില്‍ കണ്ടതിലേറ്റവും മനോഹരമായ പ്രകൃതി ദൃശ്യം കണ്‍‌മുന്നില്‍.നാലു ചുറ്റിലും പച്ചപ്പിന്റെ പ്രളയം.
തെളിഞ്ഞും കോടയില്‍ മറഞ്ഞും മലനിരകള്‍..
തണുത്ത് ശക്തിയേറിയതെങ്കിലും വിശുദ്ധിയുടെ ഗന്ധമുള്ള കാറ്റ്.
മലയിടുപ്പുകള്‍ക്കിടയില്‍ ഒരു വെള്ളിയരഞ്ഞാണം പോല്‍
കുന്തിപ്പുഴ ഒഴുക്കു തുടങ്ങുന്നത് മഞ്ഞില്‍പ്പുതഞ്ഞു കാണാം..
നിര്‍ന്നിമേഷരായി നോക്കിക്കൊണ്ടു നില്‍ക്കേ, മഴവരുന്നതുപോലെ
കോടയിറങ്ങി ഞങ്ങളെപ്പൊതിഞ്ഞു.
മഞ്ഞിന്റെ ആശ്ലേഷണത്തില്‍ മനം നിറഞ്ഞ്, സര്‍‌വവും വിസ്മരിച്ച്, തുള്ളിച്ചാടിക്കൊണ്ട് മനോജ്.
കാറ്റിന്റെ ശക്തിയിലോ, മനസ്സിന്റെ ലഘുത്വത്തിലോ
പൊങ്ങിപ്പോവുന്നുവെന്ന തോന്നല്‍....
അവിസ്മരണീയമായ കാഴ്ചനിമിഷങ്ങള്‍..
അപാരമായ പ്രകൃതിയുടെ മുന്‍പില്‍ വിനീതനായി ഏതു മനുഷ്യനും ഒരു വേള ധ്യാനനിമഗ്നനായിപ്പോവും. എങ്കിലും ലൗകിക ജീവിതത്തിന്റെ രാവണന്‍ കോട്ടയില്‍ നിന്നും ഏറെ പുറത്തല്ല എന്നോര്‍മ്മിപ്പിച്ചു കൊണ്ട് എപ്പോഴോ മനോജിന്റെ ബ്ലാക്ക് ബെറി ശബ്ദിച്ചു. ആഞ്ജിയോപ്ലാസ്റ്റി കഴിഞ്ഞ ഏതോ ഒരു മനുഷ്യന്റെ കുഴഞ്ഞു മറിഞ്ഞ ഹൃദയതാളങ്ങള്‍ മനോജിനെ കാഴ്ചകളില്‍ നിന്നു വേര്‍പെടുത്തി.
ദൃശ്യമെന്നതു പോലെ കാഴ്ചയെന്നതും ആപേക്ഷികം.
പങ്കിട്ട നിമിഷങ്ങള്‍ക്ക് എത്ര പ്രസക്തിയുണ്ട്?
പ്രകൃതിയുടെ അപാരതയെ തിരസ്കരിച്ച കെ.പിയ്ക്ക് നഷ്ടമായതെന്തെന്ന്‍
എങ്ങനെ പറഞ്ഞു മനസ്സിലാക്കും?
ടവറിന്റെ പാതി വഴിയില്‍ന്‍ തങ്ങി ഇറങ്ങിപ്പോയ നാലുപേരേക്കാള്‍
കൂടുതല്‍ ഞങ്ങളെന്തു നേടി?
ഞാനാര്, നിങ്ങളാര് ?
മരണശേഷം അവശേഷിപ്പിച്ചു പോവുന്നതു മാത്രമാണോ ജീവിതമെന്നത്?

സൈലന്റ് വാലി: ഒരു മഴ യാത്ര..പാര്‍ട്ട് രണ്ട്

2011-07-29T13:44:00.000+05:30

സൈലന്റ് വാലിയില്‍ എട്ടുമണിക്കാണ് ഔദ്യോഗിക പ്രവേശമെങ്കിലും, നേരത്തെ പോയാല്‍ മാത്രമേ മൃഗങ്ങളെ കാണാന്‍ പറ്റൂവെന്നതിനാല്‍ ഏഴുമണിക്ക് തന്നെ എഴുന്നേറ്റു.

തെളിഞ്ഞ പ്രഭാതം, മുറ്റത്തെ മരത്തലപ്പുകളില്‍ക്കൂടി ഉദയസൂര്യന്റെ വജ്രകിരണങ്ങള്‍ ഭൂമിയെത്തിരഞ്ഞു നടക്കുന്നു. രാത്രി മലയില്‍ മഴ കുറഞ്ഞതുകൊണ്ടാവണം, ശബ്ദം കുറച്ച് കുന്തിപ്പുഴ ഉല്ലസിച്ചാണൊഴുകുന്നത്. തോര്‍ച്ചയില്‍ തേന്‍ തേടി പുള്ളിപ്പൂമ്പാറ്റകള്‍ പൂക്കളിലേയ്ക്ക്. സൂര്യനു പുറം തിരിഞ്ഞ് ധൃതിയില്‍ വലനെയ്ത് ഇരയെക്കാത്തിരിക്കുന്ന ഒരു വരയന്‍ ചിലന്തി.. വിശുദ്ധമായ മണങ്ങള്‍; മണ്ണിന്റെ, മരത്തിന്റെ, കാറ്റിന്റെ.... വശ്യമായ വന്യത.

എട്ടരയോടെ ജീപ്പു വന്നു.
കെ.പി നീലേശ്വരത്തേക്കു ബുക്കുചെയ്തിട്ടുള്ള ട്രെയിന്‍ കിട്ടില്ലായെന്നു പറഞ്ഞ് ഒഴിവായി. ആവത് പരിശ്രമിച്ചിട്ടും തീരുമാനത്തില്‍ നിന്നും പിറകോട്ടില്ല ചങ്ങാതി. എത്രയോ ട്രെയിനുകള്‍ എത്രയെത്ര സ്റ്റേഷനുകളിലൂടെ ഓടിപ്പോയിരിക്കുന്നു. നമ്മുടെ പാളത്തില്‍ ഇന്നുള്ളത് ഒരു അസുലഭ വണ്ടിയാണെന്നത് അവനോര്‍ക്കാമായിരുന്നു. ഒറ്റപ്പാളങ്ങലിലൂടെ കമല ക്ലബ്ബ് എത്ര ഓടിയിരിക്കുന്നുവെങ്കിലും!

ഫോറസ്റ്റ് ഓഫീസില്‍ എല്ലാവരും പേരെഴുതി ഒപ്പിട്ടു. ഫീസ് കുഞ്ഞച്ചന്‍ ചേട്ടന്‍ കൊടുത്തിരിക്കുന്നു. ജീപ്പില്‍ കയറുമ്പോള്‍ ഗൈഡ് സന്തോഷ്, മുക്കാളിയില്‍ വെയിലാണെങ്കിലും സൈലന്റ് വാലി കോര്‍ സോണില്‍ മഴയായിരിക്കുമെന്നു തറപ്പിച്ചു പറഞ്ഞത് ഒട്ടൊന്നു വിഷമപ്പെടുത്തി. മുന്‍പില്‍ വേറെ ജീപ്പുകള്‍ പോയിക്കഴിഞ്ഞ സ്ഥിതിക്ക് മൃഗങ്ങളെ കാണാന്‍ സാധ്യതയുമില്ലത്രെ. കുറച്ചിട ചെന്നപ്പോള്‍ സൈലന്റ് വാലിയിലേക്കുള്ള പ്രവേശന കവാടത്തിലെത്തി.

അനുമതി ലഭിച്ചു കഴിഞ്ഞ് വാലിയിലേക്കുള്ള യാത്ര തുടങ്ങി; ഗിരിജന്‍ സൊസൈറ്റിയുടെ പ്രവര്‍ത്തന മേഖലയിലൂടെ, മെറ്റല്‍ റോഡിലൂടെ കയറ്റങ്ങള്‍, വളവുകള്‍. വൈത്തിരി സുഗന്ധഗിരിയിലെന്ന പോലെ, കുരുമുളകും കാപ്പിയും ഏലവും കൃഷിയിറക്കി ആദിവാസികള്‍ വസിക്കുന്ന ഇടം. താഴ്വരയില്‍ അഹാഡ്സ് നിര്‍മ്മിച്ച കോണ്‍ക്രീറ്റ് വീടുകള്‍. ചിലയിടങ്ങളില്‍ സൗരോര്‍ജ്ജ വൈദ്യുത വേലികള്‍. മുമ്പവിടെ ആനയിറങ്ങി ഒരാളെ ചവിട്ടിക്കൊന്നതിന്റെ പ്രതിഷേധം കാരണമാണ് കമ്പിവേലികള്‍ സ്ഥാപിച്ചതത്രെ. വയനാട്ടിലെ കൃഷിയിടങ്ങളിലെ വൈദ്യുത വേലി ആനകള്‍ എത്രയോ വട്ടം ചവിട്ടിപ്പൊളിച്ചിരിക്കുന്നുവെന്ന് പുഞ്ചിരിയോടെ മനസ്സിലോര്‍ത്തു.

ഇടയ്ക്ക് താഴ്‌വാരങ്ങളില്‍ വൃക്ഷത്തലപ്പുകളില്‍ പക്ഷിക്കൂട്ടങ്ങളുടെ ചിലപ്പുകള്‍.

കൃഷിയിടങ്ങള്‍ കഴിഞ്ഞ് കയറ്റം തുടങ്ങിയപ്പോഴെയ്ക്കും മഴ ചാറിത്തുടങ്ങി. തണുപ്പേറുന്നു, കോടയില്‍ മുങ്ങിയ വഴി, കാടിനു കനം വച്ചു വരുന്നു.

ഇടയില്‍ വഴിയരികില്‍ ഒരു വെള്ളച്ചാട്ടം കണ്ടപ്പോള്‍ മഴ വകവയ്ക്കാതെ ഒരു ഫോട്ടോ സെഷന്‍. ജീപ്പില്‍ തിരികെക്കയറിയപ്പോള്‍ പാന്റിലും കാലിലും തൂങ്ങിപ്പിടിച്ച് അതിഥിയാത്രക്കാര്‍: അട്ടകള്‍. യാത്ര പ്ലാന്‍ ചെയ്തപ്പോഴേ മനോജാണ് പുകയിലയും ഉപ്പും കൊണ്ടുവരാമെന്നേറ്റത്. ഏറ്റതല്ലേ, അദ്ദേഹമത് കൊണ്ടുവരികയും സെയ്ഫായി കാറില്‍ വയ്ക്കുകയും ചെയ്തിട്ടുണ്ട്; മുക്കാളിയില്‍! ചിരികള്‍, കുടച്ചിലുകള്‍, സീല്‍ക്കാരങ്ങള്‍, അട്ടകളുടെയും കമലകളുടെയും. അട്ടഹാസമെന്നതിന് രഘുവിന്റെ പുതിയ നിര്‍‌വചനം: തടിച്ചൊരു ഞരമ്പിനടുത്ത് ഇടം കിട്ടിയ അട്ടയുടെ ചുണ്ടില്‍ വിരിയുന്ന മൃദു മന്ദഹാസമാണു പോല്‍, അട്ട'ഹാസം'!

കുറച്ചിട ചെന്നപ്പോള്‍ മരത്തലപ്പുകളില്‍ ഒരു മിന്നായം. നിര്‍ത്തിയിറങ്ങിയപ്പോഴേയ്ക്കും ഒരു സിംഹവാലന്‍, നിഴല്‍ പോലെ, അകലെയെത്തിയിരിക്കുന്നു. ചക്കപോലെയുള്ള ഒരു കായുണ്ടാവുന്ന മരങ്ങള്‍. വര്‍ഷങ്ങള്‍ക്കു മുന്‍പ് വീണുപോയ ഒരു വന്‍മരം കേടുപാടുകളൊന്നും കൂടാതെ വഴിയരികില്‍ കിടക്കുന്നു. സ്വാഭാവികമായ വനവും ആവാസ വ്യവസ്ഥയുമാണ് പരിരക്ഷിക്കപ്പെടുന്നതെന്ന് ഗൈഡ്. വനവല്‍ക്കരണമല്ല, വന സം‌രക്ഷണമാണ് സൈലന്റ് വാലിയാകെ.

മുന്നില്‍ വഴിയുടെ വശങ്ങളില്‍ പുല്ലുകള്‍ വളര്‍ന്നയിടത്ത് വണ്ടി നിര്‍ത്തി സന്തോഷ് പുറത്തിറങ്ങി. ഒച്ചയുണ്ടാക്കരുത്, മൃഗങ്ങള്‍ ഓടിയകലുമെന്നു മുന്നറിയിപ്പോടെ. പതുക്കെ നടന്ന് ഒരു മരത്തിനടുത്തെത്തിയപ്പോള്‍ ഒരു സിംഹ വാലനും അടുത്ത മരത്തില്‍ കരിങ്കുരങ്ങുകളുടെ കൂട്ടവും. മഴ വകവയ്ക്കാതെ ക്യാമറ ഉയര്‍ത്തിയപ്പോഴെക്കും ജീപ്പിനടുത്തുനിന്നും ടീപിയുടെ ദീനരോദനവും രഘുവിന്റെ പൊട്ടിച്ചിരിയും. പുല്‍ത്തലപ്പുകളില്‍ നിന്നും അട്ടകള്‍ കഴുത്തു തിരഞ്ഞു വരുന്നത്രെ. തിരിഞ്ഞു നോക്കി വീണ്ടും ഫോക്കസ് ചെയ്യുമ്പോഴേയ്ക്കും ശബ്ദം കേട്ട് കുരങ്ങുകള്‍ ഉള്ക്കാട്ടിലേക്കു വലിഞ്ഞു കളഞ്ഞു. കാണാനൊത്തതിന്റെ സന്തോഷം, പകര്‍ത്താനാവാത്തതിന്റെ ഇച്ഛാഭംഗം!

കോര്‍ സോണിലേക്കുള്ള കവാടം കോടമഞ്ഞില്‍ മുങ്ങിയിരിക്കുന്നു. വേനലിലായിരുന്നെങ്കില്‍ ഒന്നര കിലോമീറ്റര്‍ കൂടി ഉള്ളിലേയ്ക്കു പോവാമായിരുന്നു, മഴക്കാലത്ത് മഞ്ഞില്‍ പതുങ്ങിയിരിക്കുന്ന ഒറ്റയാന്മാര്‍ ഒഴിയാന്‍ ഇടതരാതെ ആക്രമിച്ചേക്കുമെന്നതിനാല്‍ പുഴവരെയും അതിലുള്ള തൂക്കുപാലം വരെയും പെര്‍‌മിഷന്‍ ഇല്ലത്രെ.

സൈരന്ധ്രിയിലെ വാച്ച് ടവര്‍ എത്തിയപ്പോഴേയ്ക്കും മഴ തോര്‍ന്നിരിക്കുന്നു . തെളിച്ചം കുറവെങ്കിലും പ്രകൃതി കനിഞ്ഞിരിക്കുന്നു. മനോജും ഗോപാലും ഞാനും മുകള്‍ വരെ കയറി.ബാക്കിയുള്ളവര്‍ പാതിയില്‍ നിര്‍ത്തി.
ജീവിതത്തില്‍ കണ്ടതിലേറ്റവും മനോഹരമായ പ്രകൃതി ദൃശ്യം കണ്‍‌മുന്നില്‍.

(തുടരും..)

സൈലന്റ് വാലി: ഒരു മഴ യാത്ര..പാര്‍ട്ട് ഒന്ന്

2011-07-28T09:13:00.003+05:30

ദീപക് ഹര്‍ഷന്‍

2009-07-21T11:55:00.001+05:30

ഓര്‍മ്മകളെ ആനയിക്കാന്‍
മരണത്തെപ്പോലെ
ആര്‍ദ്രതയുള്ള മറ്റൊന്നുമില്ല.

കമല ക്ലബ്ബിലെ
ഇളയവനായ
ഞങ്ങളുടെ
ഡക്കന്‍
പറയാതെയങ്ങ്
പോയ്ക്കളഞ്ഞു...

ഊഷ്മളവും
കൂടുതല്‍ ദീപ്തവുമായ
സ്മരണകളില്‍
ഡോ. ദീപക് ഹര്‍ഷന്‍
ഞങ്ങളില്‍ നിറയുന്നു...

അകാലത്തില്‍
വിട്ടു പിരിഞ്ഞ
കൂട്ടുകാരന്റെ
കുടുംബത്തോടൊപ്പം
സങ്കടത്തിന്റെ
പെരുമഴയില്‍
വിറങ്ങലിച്ച്
ഞങ്ങള്‍ .....

കമലചരിതം ആറാം വാല്യം : അന്നക്കിളി

2009-03-30T16:59:00.000+05:30

ഫൈനല്‍ ഇയര്‍ റിസല്‍ട്ടു വന്നു. പൊതുജനത്തിന്റെ പ്രതീക്ഷയ്ക്കു കടകവിരുദ്ധമായി കമല ഒന്നാം ക്ലാസിനു ഒരു മാര്‍ക്കു കുറവില്‍ പാസായി. ഹൌസ് സര്‍ജന്‍സി തുടങ്ങാന്‍ ഒന്നൊന്നര മാസം സമയമുണ്ട്. ക്രിയാത്മകമായി എന്തെങ്കിലും ചെയ്യണമെന്ന് തോന്നിത്തുടങ്ങുന്ന സമയമാണ്, എന്തും സംഭവിക്കാം. നീണ്ട ആലോചനകള്‍ക്കൊടുവില്‍ , പരിഷ്കാരത്തിന്റെ ആദ്യഘട്ടമെന്ന നിലയില്‍ , ഉറക്കക്കുറവുകാരണം ഉടഞ്ഞ തടിയൊന്നു നന്നാക്കിക്കളയാമെന്ന്‌ തീരുമാനവുമായി.

കുളി, മെസ്സ്, ടിവി ഹാള്‍ ,ഇന്ത്യന്‍ എക്സ്പ്രസ്, മെസ്സ്‌, സണ്‍ ടിവി , ഇടയ്ക്കൊരു റ്റോയ്‌ലെറ്റ് തീര്‍ത്ഥാടനം, കോറിഡോര്‍ ക്രിക്കറ്റും അനുബന്ധമായുള്ള തല്ലും, ലേറ്റ് മെസ്, വണ്ണത്തിലുള്ള കൂര്‍ക്കംവലി തുടങ്ങി ചിട്ടയോടെയുള്ള ചര്യകള്‍ ; ജീവിതത്തിനു ഒരു അര്‍ത്ഥമൊക്കെ വന്നുവെന്ന പ്രതീതി. ഏതാണ്ട് സന്തോഷ് മാധവന്റേതു മാതിരി ആധ്യാത്മിക ജീവിതം, പക്ഷേ, വ്യത്യാസമായി കമലയ്ക്ക് ബജ്‌രംഗബലിയുടെ അനുഗ്രഹം ഉണ്ടായിരുന്നു എന്നു മാത്രം.

പണ്ടൊക്കെ ക്ലാസില്‍ പോവുന്ന വഴിക്ക് ഇന്‍ ചെയ്തത് ശരിയായോ എന്നറിയാനാണ് കമല ജിമ്മില്‍ കയറാറ്. ഉപകരണങ്ങളുടെ ഇടയില്‍ ആള്‍പ്പൊക്കമുള്ള വലിയ കണ്ണാടിയില്‍ ആരാധനയോടെ തന്നെത്തന്നെ നോക്കിനില്‍ക്കുമ്പോള്‍ കമല എല്ലാം മറക്കും, ക്ലാസ്സില്‍ പോവാനിറങ്ങിയതാണെന്നു കൂടി. കക്ഷം കൊണ്ട് കുരുമുളകു പൊടിക്കുന്നുവെന്ന്‍ തോന്നിപ്പിച്ചുകൊണ്ട് വല്ല പോത്തുമോറനും വന്ന് കവച്ചുനിന്ന് മസിലുപെരുപ്പിക്കുമ്പോഴാണ് ആത്മരതി അവസാനിക്കുക. പക്ഷേ കാര്യങ്ങളിപ്പോള്‍ ബ്രെയ്ക്കിനു കേറ്റിയ ലെയ്‌ലാന്‍ഡ് ബസുപോലെയായ സ്ഥിതിക്ക് ജിമ്മില്‍ പോയേ മതിയാവൂ. തിന്നുന്നതു മാത്രം പോരല്ലോ, കൊക്കപ്പുഴുവും നാടവിരയും തിന്നു മിച്ചമായതു തടിക്കു പിടിപ്പിക്കണമെന്നുണ്ടെങ്കില്‍ മസിലുകള്‍ വേണം, പൂണൂലു പോലെ തൂങ്ങിക്കിടക്കുന്ന ഞാഞ്ഞൂല്‍ പേശികള്‍ മാത്രം പോര താനും.

അങ്ങനെ ഒരു രാത്രി ജിമ്മില്‍ കളിച്ച്, ജൂനിയര്‍ ബാച്ചിലെ ഒരു വരത്തന്‍ തന്നെ നോക്കിത്തന്നെയാണ് ബൈസെപ്‌സ് മുഴപ്പിച്ചതെന്ന കുണ്ഠിതത്തോടെ, കുളിയും കഴിഞ്ഞ് മെസ്സില്‍ ചെന്ന കമല, പോരാട്ടം പിന്നീട് പൊറോട്ടയോടാക്കി. ഉണ്ടു കഴിഞ്ഞൊന്നു മുറുക്കുന്നതിനു വേണ്ടി നാണിത്തള്ള വെറ്റില കീറുന്നതുപോലെ, പൊറോട്ട ചുരുട്ടിപ്പിടിച്ച്‌ ചവറു ചവറു പോലെ കഷ്ണങ്ങളാക്കിയിട്ടും കലിയടങ്ങാത്ത കമല, സാല്‍ന എന്നു ചെല്ലപ്പേരുള്ള ചാറൊഴിച്ച് കുഴച്ച് അവറ്റയെ ഉണ്ടയാക്കി നിര്‍ത്തുകയും, കുട്ടികള്‍ ഹോമിയോഗുളിക കഴിക്കുന്ന ലാഘവത്തോടെ വെട്ടിവിഴുങ്ങുകയും ചെയ്യുമ്പോഴാണ് അശരീരി പോലെ, അനോണിമസ് അവിടെയെത്തുന്നത്‌. പാസായതിലുള്ള അഭിനന്ദനങ്ങള്‍ കേട്ടു കഴിഞ്ഞപ്പോള്‍ കമലയ്ക്കു വായിലുള്ളത് ഇറക്കാന്‍ പറ്റാത്തത്ര ഗദ്ഗദം വന്നു; ഒരു വിധം തിന്നെണീറ്റുവെന്നു മാത്രം.

നന്ദിപ്രകാശനമെന്ന നിലയ്ക്കു നല്‍കിയ ഐസ്ക്രീം നുണയുന്നതിനിടയ്ക്കാണ് അനോണിമസ് ആഗമനോദ്ദേശം എറിഞ്ഞു പിടിപ്പിക്കുന്നത്. പാലക്കാട് ഒരിടത്ത് രണ്ടാഴ്ചത്തേയ്ക്ക് ഡോക്ടറെ വേണം; ചെന്തമിഴ് ഒരുമാതിരി മെരുക്കമുള്ള ആരെങ്കിലുമാവണം താനും. കുട്ടിക്കാലത്ത് ഹരിഹര്‍ ടാക്കീസിന്റെ ഏറ്റവും മുന്നിലെ ബെഞ്ചിലിരുന്ന് മനിതന്‍ കണ്ട്‌ കണ്ണുമിഴിച്ച അന്നു തുടങ്ങിയ ആരാധനയുമായി രജിനിയെയും തമിഴനെയും സ്‌നേഹിക്കുന്ന കമലയ്ക്ക് സഹിക്കുമോ? അപ്പോള്‍ത്തന്നെ വേണമെങ്കില്‍ പുറപ്പെട്ടുകളയും എന്ന നിലയായി.

വെളുപ്പിനു തന്നെ തിരിച്ച കമല പിറ്റേന്ന് ഉച്ചയോടെ സംഭവ സ്ഥലത്തെത്തി. പുതിയ ആശുപത്രിയാണ്. സ്ഥിരം ഡോക്ടറെപ്പോലെത്തന്നെ സ്ഥിരം രോഗികളും രോഗങ്ങളും ആയി വരുന്നതേ ഉള്ളൂ. നിഷ്കളങ്കരായ നേഴ്സുമാര്‍ , നിര്‍‌മമനായ മാനേജര്‍ , നിഷ്കാസിതനായ വാച്ചര്‍ , നിഷ്കാമ കര്‍മ്മയോഗിയായ കമല....ഭൂമി സമത്വസുന്ദരമായി വരുന്ന സമയം. തമിഴ്നാടിനോട് ചേര്‍ന്നുകിടക്കുന്ന ഒരു ചെറു പട്ടണം; മുണ്ടിക്കല്‍ത്താഴം ടൌണില്‍ ഏതാണ്ട് വായനശാലമുതല്‍ പഞ്ചായത്തുകിണര്‍ വരെയുള്ള സ്ട്രിപ്പു പോലെ. കറ്റകയറ്റിപ്പോവുന്ന കാളവണ്ടികള്‍ , തൊലിയാണോ അതോ ചെളിയാണോ ഭേദം എന്ന ഉല്‍‌പ്രേക്ഷ ജനിപ്പിച്ചുകൊണ്ട് മെഴുക്കുപുരണ്ട ശരീരങ്ങളുമായി ഗ്രഹണി പിടിച്ച പാണ്ടിപ്പിള്ളേര്‍ ,കൊലുസും മൂക്കുത്തിയും മിട്ടികളുമായി പച്ചപ്പാവാടകളില്‍ നടി കനകയെപ്പോലെ പൊടിപറത്തി നടക്കുന്ന പെണ്‍ കൊടികള്‍ ...റണ്ണിലെ മാധവനെപ്പോലെ 'മിസ്സി മിസ്സിയ മോ, മിമ്മിസ്സി മിസ്സിയ മോ' എന്ന കീര്‍ത്തനം ആലപിക്കാന്‍ കമലയ്ക്ക് തോന്നിയതില്‍ ഒരു തെറ്റുമില്ല. ആ ആംബിയെന്‍സില്‍ ഒരു മൂളിപ്പാട്ടെങ്കിലും പാടിയില്ലെങ്കില്‍ മോശവുമല്ലേ!

പാലക്കാടന്‍ മട്ടയില്‍ കുളമ്പൊഴിച്ച് കൊണ്ടാട്ടവും കൂട്ടി മുറുക്കിയൊന്നു പിടിച്ച് ജെറ്റ് ലാഗ് തീര്‍ത്ത കമല ഊണു കഴിഞ്ഞൊന്നു കിടന്നു. ഉറക്കത്തില്‍ എംഡിയെടുക്കുന്നതും അതുകഴിഞ്ഞ് കോളേജ് ലെക്‌ചററെ കല്യാണം കഴിക്കുന്നതുമൊക്കെ സ്വപ്നം കണ്ടു. ഹണിമൂണിനു കൊടൈക്കനാല്‍ പോയി തിരിച്ചു വരുന്നതിനിടയ്ക്ക് പൊള്ളാച്ചിക്കടുത്ത്‌ വഴിവക്കിലിരുന്നു പഴുത്ത ‍പുളി വില്‍ക്കുന്ന ഒരു തമിഴനോട് വിലപേശുന്നതുവരെ നീണ്ടു കിനാവ്. രോഗികള്‍ കാത്തു നില്‍ക്കുന്നുവെന്നറിയിക്കാന്‍ ചെന്ന വാച്ചര്‍ കാണുന്നത് വായുവില്‍ കൈകള്‍ ചുഴറ്റി കൂര്‍ക്കത്തിനിടെ, അവ്യക്തമായി, ആരെയോ പ്രാകുന്ന കമലയെ ആയിരുന്നുവെന്ന് ചരിത്രം രേഖപ്പെടുത്തിയിരിക്കുന്നു. വിളികേട്ട് ഞെട്ടിയെണീറ്റ കമല കരാട്ടെ പഠിപ്പിക്കുന്നതിനിടെ കാലുതെറ്റി വീണുപോയ മാസ്റ്ററെപ്പോലെ വിളറിയിരുന്നുവെന്നാണ് ശ്രുതി.

തിരക്കിട്ടു ചെന്ന നേരം, ഒപിയുടെ മുന്‍പിലുള്ള ആള്‍ക്കൂട്ടം കണ്ടപ്പോള്‍‍ , ഒന്നാം തീയ്യതി തെറ്റിത്തുറന്ന ബീവറേജ് കടയുടെ മുന്‍പിലെത്തിയ പ്രതീതിയായിരുന്നു, ആശുപത്രിയില്‍ . ആറ് ജീപ്പ്, ബോണറ്റിനു കീഴെ നാരങ്ങ ഞാത്തിയിട്ട്‌ കളഭം വാരിത്തേച്ച ഒരു അമ്പാസഡര്‍ കാര്‍ , അഞ്ചെട്ട് സൈക്കിള്‍ , അതിലേറി വന്ന പുരുഷാരം; തന്റെ ഗുരുത്വം ഗംഭീരമാണെന്നു കമല സ്വയം സമ്മതിച്ചു. അല്ലെങ്കില്‍ എങ്ങനെയാണ്, വന്നവിവരം ഗുരുത്വാകര്‍ഷണം മൂലം നേഴ്സ്മാര്‍ പോലും അറിഞ്ഞു വരുന്നതിനു മുന്‍പേ ഇങ്ങനെയൊരു തിക്കും തള്ളും? എന്നാല്‍ തിരക്കു നിയന്ത്രിച്ച് സ്ഥിതി നിയന്ത്രണാതീതമാക്കിയപ്പോഴാണ് കാര്യങ്ങള്‍ തെളിഞ്ഞത്. രോഗി കാറില്‍ നിന്ന് ഇറങ്ങിയിട്ടില്ല. ഡോക്ടറെക്കൊണ്ടു മുടിയുമാ എന്നു തെരിഞ്ചിട്ടു വേണമല്ലോ പെരിയപ്പാവെ ഇറക്കാന്‍ ‍എന്നതാണ് ബൈസ്റ്റാന്‍ഡേഴ്സിന്റെ ന്യായം.

മേശക്കെതിര്‍‌വശത്തിരുന്ന ഭീകരനെക്കണ്ടപ്പോള്‍ വന്നവണ്ടിയില്‍ത്തന്നെ പാലക്കാട്ടേക്കു വിട്ടോളാന്‍ പറയാനാണ് കമലയ്ക്കു തോന്നിയത്. നടന്‍ നെപ്പോളിയന്റെ ശരീരത്തില്‍ , റോഡുപണിക്കാര്‍ ചോറുവെക്കുന്ന അലുമിനിയക്കലം പോലുള്ള തലപിടിപ്പിച്ച, ഒരു ബകന്‍ . മുതല്‍ മരിയാദയിലെ വിജയകാന്തിന്റെ കളര്‍ ,കപ്പടാ മീശ, മുറുക്കിയ വായ്ക്കകത്ത് ഉരുണ്ടതെന്തോ നുണഞ്ഞുകൊണ്ടിരിക്കുന്നുവെന്ന ചേഷ്ട, ചെങ്കണ്ണു തോറ്റു പോവുന്നത്ര വികാരവിക്ഷുബ്ധമായ കണ്ണുകള്‍ ...വര്‍‌ണ്ണ്യത്തിന്റെ ബാഹുല്യത്തില്‍ കമലയ്ക്കു വീര്‍പ്പുമുട്ടി. പക്ഷേ വിശദീകരണത്തിനായി ഗൌണ്ടര്‍‍ വാ തുറന്നതും കമലയ്ക്കു ശ്വാസം നേരെ വീണു. ജെന്‍ഡര്‍ തെറ്റി പടച്ചതമ്പുരാന്‍ ഫീമെയ്ല്‍ വോക്കല്‍കോര്‍ഡ് പിടിപ്പിച്ച ഒരു പോമറേനിയന്‍‍ ..സ്ത്രീ ശബ്ദം കേട്ട് കമലയ്ക്ക് കര്‍ത്താവിന്റെ ക്രിയയോര്‍ത്ത് സങ്കടം എന്ന കര്‍മ്മം വന്നു.

തലയാളവും മമിഴും ചേര്‍ന്ന് വാല്യക്കാരന്റെ കയ്യിലെ കോളാമ്പിയിലേക്കുള്ള മുറുക്കിത്തുപ്പലുകളുടെ കൂടെ ഗൌണ്ടര്‍‍ കാര്യങ്ങള്‍ പറഞ്ഞു പിടിപ്പിച്ചതില്‍ കമലയ്ക്കു മനസ്സിലായത് ഇതൊക്കെയാണ്‌: പെരിയപ്പ മൂപ്പു കൂടിയ ഐറ്റമാണ്‌. കാച്ചലും ഇരുമ്മലും തുടങ്ങിയിട്ട് കാലം ഇമ്മിണിയായി. ശാപ്പാടിന്റെ കാര്യം പറയുകയേ വേണ്ട. ആയുസ്സാണെങ്കില്‍ സുമ്മാ മിച്ചം കിടക്കുന്നു. ഗ്ലൂക്കോസ്, ഊശി, മാത്രെ ഇതെല്ലാം പോട്ട് അയ്യാവെ ശെരിപ്പെടുത്തണം.

ആമുഖം കഴിഞ്ഞാണ് അപ്പാപ്പനെ പൂമുഖത്തേക്ക് എടുക്കുന്നത്. രണ്ടു തടിമാടന്മാരുടെ കൈകളില്‍ ഒലുമ്പിയിട്ട കരിമ്പടം പോലെ ഞാത്തിയിട്ടാണ് പെരിയവരുടെ വരവ്. ചെവികേള്‍‍ക്കാത്തതു കൊണ്ടാണോ അതോ പറയുന്നത് തെരിയാഞ്ഞിട്ടാണോ എന്നറിയില്ല, ചോദ്യങ്ങള്‍‍ക്കൊക്കെ കണ്ണൂ മിഴിച്ച് ഗഹനമായി നോക്കുന്നതല്ലാതെ, അപ്പാപ്പന്‍ ഒരക്ഷരം പോലും പേശാന്‍ കൂട്ടാക്കിയില്ല. സഹികെട്ട കമല ഉള്ള അറിവുവച്ച്‌ കാച്ചല്‍ , ഇരുമ്മല്‍ തുടങ്ങിയ പദങ്ങളെ വിഗ്രഹിച്ച് പനി, കഫക്കെട്ട് എന്നു പദ്യരൂപത്തിലെഴുതി, ആധുനികവിതകളുടെ ഫൂട്ട്നോട്ടു പോലെ ഇന്‍ജക്‌ഷനുകളുമെഴുതി, തലക്കെട്ടായി ന്യുമോണിയ എന്ന പേരും ചാര്‍ത്തി പെരിയവരെ ഉടനടി വാര്‍ഡിലേക്കു മാറ്റി.

ദിവസം വച്ച് അടിയാളന്മാരുടെ എണ്ണം കുറഞ്ഞു വന്നെങ്കിലും, നിത്യവും ഒരു പീറച്ചെറുക്കന്റെ കൂടെ സൈക്കിളില്‍ ടിഫിനുമായി വന്ന് സിസ്റ്റര്‍മാരോട് കലപിലകൂട്ടുന്ന അന്നക്കിളിയെ കമല ആദ്യമൊക്കെ കണ്ടില്ലെന്നുതന്നെ നടിച്ചു. പാണ്ടികളുടെ ഇടയില്‍ , പഞ്ചാമൃതത്തില്‍ പിണങ്ങി നില്‍ക്കുന്ന പൂവമ്പഴം പോല്‍ ഒരുത്തി. കാച്ചെണ്ണ തേച്ച് വിതര്‍ത്തിട്ട മുടിയില്‍ മുല്ലപ്പൂ ചൂടി, റെക്‌സോണയുടെ ഊഷ്മളമായ ഗന്ധം പരത്തി, കൊലുസിട്ട കണങ്കാലുകള്‍ തറയില്‍ തൊടാതെയെന്നവണ്ണം ഒഴുകിസഞ്ചരിക്കുന്ന കിളി ഗൌണ്ടരുടെ മകളാണെന്ന് മനസ്സിലാക്കാന്‍ കമലയ്ക്ക് വീഗൈഡിന്റെ ആവശ്യമൊന്നും വേണ്ടല്ലോ! മഞ്ഞള്‍ തേച്ചു മിനുസപ്പെടുത്തിയ നനുത്ത കവിളത്ത് തന്നെക്കാണുമ്പോഴൊക്കെ വിളര്‍ച്ച വരുന്നത് കാണാതിരിക്കാന്‍ മാത്രം കഠിനഹ്രൃദയനാണോ കമല?

രാവിലത്തെ ടിഫിനുവേണ്ടി അക്ഷമയോടെ അപ്പാപ്പന്‍ മുക്കിയും മൂളിയുമിരിക്കുമ്പോള്‍ കാത്തിരിപ്പിന്റെ അസ്വസ്ഥതയോടെ ജെല്ലിക്കെട്ടിനിറങ്ങിയ കാളയുടെ മനസ്സുമായി കമല പ്രിസ്ക്രിപ്ഷനുകള്‍ എഴുതിത്തള്ളും. മിക്കപ്പോഴും, രോഗികളില്ലെങ്കില്‍ക്കൂടിയും, അന്നക്കിളിക്കായി വാര്‍ഡ്‌ റൌണ്ട്സിന്റെ സമയം പോലും കമല വൈകിച്ചു തുടങ്ങി. തേവര്‍മകനിലെ കമലയുടെ റോളില്‍ തന്നെ സങ്കല്‍‌പ്പിച്ച് അന്നക്കിളിയോട്‌ സ്വപ്നത്തില്‍ ഇഞ്ചിപ്പാട്ടു പാടിത്തുടങ്ങിയെന്നര്‍ഥം.

എത്തിയാലുടന്‍ , സ്പീഡില്‍ ചവിട്ടാത്തതിനു ചെക്കനെയും സൈക്കിളിനെയും ‍ചീത്തവിളിച്ചുകൊണ്ടാണ് അന്ന വായ്ത്താരി തുടങ്ങുക.‌ വരവറിഞ്ഞാല്‍ , കൈകഴുകാനെന്ന വ്യാജേന വാഷ്ബേസിനടുത്തു ചെന്ന് കമല ജനലിലൂടെ പാളിനോക്കും, അപ്പാപ്പന്‍ ഇന്നെങ്ങനെയുണ്ടെന്നറിയാന്‍ മാത്രം. തീറ്റകൊടുത്ത് അപ്പാപ്പനെ കിടത്തി, ചെക്കനെ ഐസ് വാങ്ങാന്‍ വിട്ടുകഴിഞ്ഞാല്‍ അന്നക്കിളി പിന്നെ ഫ്രീയാണ്. നേഴ്സു വരും മുന്‍പേ‍ റൌണ്ട്സ് തുടങ്ങുന്ന കമല പാണ്ടിപ്പടങ്ങള്‍ കണ്ടു പഠിച്ചെടുത്ത തമിഴുകളെല്ലാം അപ്പാപ്പന്റെ മേല്‍ പ്രയോഗിക്കും. ഡോക്ടര്‍ ചെന്നാല്‍ ജനലിനരികില്‍ ചെന്നു നില്‍ക്കുന്ന പൊണ്ണ്, പുറത്തേക്കു നോക്കി, കാല്‍വിരല്‍കൊണ്ട് നിലത്തു നെല്ല്‌ ചിക്കുന്നതായി നടിക്കും. തന്റെ സിംഹളഭാഷ കേട്ട് ചുണ്ടുകള്‍ അമര്‍ത്തിക്കടിച്ച് ലവള്‍ കുലുങ്ങിച്ചിരിക്കുമ്പോള്‍ ഇം‌പ്രഷന്‍ വന്നുവെന്നതിന്റെ വികാരത്തള്ളിച്ചയില്‍ കമലയാകെ ഉലയും. ഒരു ഗതിയുമില്ലാതെ പെണ്ണ് മലയാളം പഠിക്കാന്‍ തുടങ്ങിയെന്ന് പ്രത്യേകം പറയേണ്ടതില്ലല്ലോ?

അന്നമനടയുമായി കൂടുതല്‍ നേരം ചെലവഴിക്കാന്‍ കമല പിന്നീട് ചില നമ്പറുകള്‍ ഇറക്കിയത് വിജയം കണ്ടുവെന്നു പറയാം. മുഴുവന്‍ സമയവും ഇങ്ങനെ കിടന്നാല്‍ കഫം കെട്ടി ചത്തുപോകുമെന്ന് ഭീഷണിപ്പെടുത്തി കിഴവനെ അറ്റന്‍ഡര്‍മാരുടെ സഹായത്തോടെ എണീപ്പിച്ചു നിര്‍ത്തുക, അന്നക്കിളി ഒറ്റയ്ക്കാണെങ്കില്‍ കിഴവനെ താങ്ങിപ്പിടിച്ച് വരാന്തയിലൂടെ നടത്തുക, നടത്തത്തിടെ കളിയായി കൈകള്‍ വിടുക, വീഴാന്‍ പോവുന്ന വൃദ്ധനെ താങ്ങിനിര്‍ത്തുന്നതിനിടെ അബദ്ധത്തിലെന്നോണം വിരലുകള്‍ സ്പര്‍ശിക്കുക തുടങ്ങിയ പുണ്യ പുരാതന ടെക്നിക്കുകള്‍ തന്നെ! അടുപ്പം മൂത്ത് ചക്കപ്പശയും ഈച്ചയും എന്ന ഘട്ടത്തിലെത്തുന്ന നേരമാണ്‌ ചിക്കന്‍ പോക്സ്‌ വില്ലനായി തിരക്കഥയില്‍ കയറുന്നതും അന്നക്കിളിക്ക് ഊരുവിട്ടു തെങ്കാശിക്കു പോവേണ്ടി വരുന്നതും.

കിളിപറന്നുപോയ കൂട്ടില്‍ ഒറ്റപ്പെട്ട വെള്ളപ്പാത്രം പോലെ വരണ്ട മനസ്സുമായി കമല പിന്നീട് കവിതകളെഴുതും. കരളുരുകിയെഴുതിയ ആ പ്രണയകവിതകള്‍ മാഗസിന്‍ എഡിറ്റര്‍മാര്‍ നിഷ്കരുണം ചവറ്റുകൊട്ടയിലേക്കെറിയുമായിരിക്കും; മങ്കൊമ്പ്, പച്ചമുളകുബജ്ജി ചേര്‍ത്തടിച്ച്, അത് സൂപ്പര്‍ഹിറ്റുമാക്കുമായിരിക്കും, എങ്കിലും...

വിരസതയുടെ ദിവസങ്ങളങ്ങനെ ‍ ഫംഗസ് പിടിച്ച കാസറ്റ് പോലെ വലിഞ്ഞു നീങ്ങുന്നതിനിടയില്‍ കഫക്കെട്ടു മാറി പെരിയപ്പ ഡിസ്ചാര്‍ജ്ജു പാകമായി. എടുക്കാന്‍ വന്ന തടിമാടന്മാരെ തള്ളി മാറ്റി മൂപ്പിലാന്‍ യാത്രപോലും പറയാതെ നടന്നുചെന്നു കാറില്‍ക്കയറി. പതിവു പുരുഷാരത്തിന്റെ അകമ്പടിയോടെ അപ്പാവിയെ വീട്ടിലേക്കു കൂട്ടാന്‍ ചെന്ന ഗൌണ്ടര്‍ ‍, ഒരു കദളിക്കുല കാണിക്ക വച്ച്, യാതൊരു മുന്നറിയിപ്പുമില്ലാതെ കമലയെ കെട്ടിപ്പിടിക്കുകയുണ്ടായി. കണ്ണീര്‍ ‌വീണുമുറിഞ്ഞ വാക്കുകള്‍ പുലമ്പിക്കൊണ്ട് ചൂണ്ടുവിരലിലിട്ട സ്വര്‍ണമോതിരം ഊരി കമലയുടെ കൈയില്‍ പിടിപ്പിച്ചാണ് അണ്ണാച്ചി യാത്രയായതു തന്നെ.

ഒരു ന്യുമോണിയ ആംപിസിലിന്‍ കൊടുത്ത് ചികിത്സിച്ചതിന്‌, മോതിരം ഊരിത്തരാന്‍ മാത്രം എന്തു തേങ്ങയാണെന്നു കമല അന്ധാളിച്ച് നില്‍ക്കേ, ദ്വിഭാഷിയായ ഹെഡ് നേഴ്സ് മൊഴിമാറ്റം നടത്തിയതിങ്ങനെ:

"സാറേയ്, കഫക്കെട്ടു മാറിയെയ്നല്ല കേട്ടോ.. കെളവന്‍ തളര്‍‌വാതം പിടിച്ച് നാലഞ്ചുകൊല്ലം അനങ്ങാന്‍ മേലാണ്ടു കെടപ്പാര്‍ന്നൂത്രേയ്...സാറ്‌ മന്ത്രോദ്യ ഏതാണ്ട് കാട്ടി അപ്പാപ്പനെ നടത്തിപ്പിച്ചു വിട്ടില്ലേയ്.. അയ്നാണു പോലും മോയിരം!"

കമല ചരിതം എട്ടാമങ്കം- ഗൈനക്കോളജി പോസ്റ്റിങ്ങ്

2009-01-30T09:59:00.000+05:30

ആഗോള സാമ്പത്തിക മാന്ദ്യം ലോകത്തെ വരിഞ്ഞു മുറുക്കിയത് ഇപ്പോഴാണെങ്കിലും, തൊണ്ണൂറുകളുടെ മദ്ധ്യത്തില്‍ , തന്റേതല്ലാത്ത കാരണത്താല്‍ , അതിന്റെ ഭീകരത അനുഭവിച്ചറിയാനുള്ള ഭാഗ്യം ഉണ്ടായ ഒരു അപൂര്‍‌വ വ്യക്തിത്വമായിരുന്നു കമലയുടേത്. റൈറ്റര്‍ കമ്പനിയുടെ ഷര്‍ട്ടും, ന്യൂ പോര്‍ട്ടിന്റെ ജീന്‍സുമായി കോളേജ് പോര്‍ട്ടിക്കോയിലൂടെയുള്ള നടപ്പും, പാനാസോണിക്ക്‍ ഡബിള്‍ ഡെക്ക്‍ റെക്കോര്‍ഡറില്‍ നിന്നും മെസ്സിലേക്കുള്ള കോറിഡോര്‍ മുഴുവന്‍ കുമാര്‍ സാനുവിന്റെ മൂക്കിലൂടെയുള്ള പാട്ടും, ഇമ്പീരിയല്‍ ലെതറും കുട്ടിക്യൂറ പൌഡറുമൊക്കെയാണു കൈയിലിരിപ്പെങ്കിലും, കുംഭമാസം മുതല്‍ മേടമാസം വരെ ചക്ക കൊണ്ടാണ് കമലയുടെ വീട്ടില്‍ പച്ചടിയും പായസവുംവരെയെന്ന് ആരും അറിഞ്ഞിരുന്നില്ലെന്നു മാത്രം.

തറവാടു വീതംവച്ച്, ഇത്തിരി നിലം സ്വന്തമായി കൈയില്‍ വന്നതിന്റെ ഹുങ്കില്‍ , അച്ഛന്‍ഗുരുക്കള്‍ വ്യവസായത്തെക്കുറിച്ച് ആലോചിച്ചതില്‍ കുറ്റം പറയാനാകുമോ? കമലയോടു ചോദിച്ചില്ലെന്നുള്ള മഹാപരാധമൊഴിച്ച് സംഗതികള്‍ സ്മൂത്തായിത്തന്നെയാണു മിക്കവാറും നീങ്ങിയതും. ഒരു വരത്തന്‍ ,കഴുത്തില്‍ കണ്ണുതള്ളുംവരെ ടൈയും മുറുക്കിക്കെട്ടി വന്ന് മൂലധനം, ലാഭം, വീതപ്പലിശ, മുതലാളിത്തം, മാരുതി എണ്ണൂറ് തുടങ്ങിയ വിഷയങ്ങള്‍ ഒറ്റശ്വാസത്തില്‍ അവതരിപ്പിച്ചപ്പോള്‍ പിതൃക്കള്‍ക്ക്‍ പിടിവിട്ടുപോയെന്നുള്ളതാണ് വസ്തുത. അതിന്‍ പ്രകാരം, അളിയന്മാരും പെങ്ങന്മാരും ചേര്‍ന്ന്‌ സ്ഥലം അന്തോണിമേസ്തിരി‍ക്ക്‌ രായ്ക്കുരാമാനം വില്‍ക്കുകയും കാശുമുഴുവന്‍ ,നിന്നനില്പില്‍ ഇരട്ടിക്കാന്‍ , മാഞ്ചിയത്തില്‍ കൊണ്ടിടുകയും ‍ചെയ്തു! വളം കിട്ടാനുള്ള സാധ്യത കൂടി കണക്കിലെടുത്ത് കാശിത്തിരി ആടിന്റെ മുകളിലും നിക്ഷേപിക്കാഞ്ഞതില്‍ കമലാധിപനു കുണ്ഠിതം തോന്നാഞ്ഞുമിരുന്നില്ലെന്നത് അമ്മ പറഞ്ഞ് കമല പിന്നീടറിയും. അറിഞ്ഞതു വേറെയുമുണ്ട്; അമ്മയുടെ കാപ്പും പാലക്കയും വിറ്റ കഥ. അതു പോട്ടെ.

നാല്പതുപറക്കണ്ടത്തിനു പകരമായി മുന്നൂറേക്കര്‍ മാഞ്ചിയം തോട്ടം മൂന്നാറില്‍ , വേലികെട്ടിത്തിരിച്ച്, പേരെഴുതി മാറ്റിവച്ചതിന്റെ ഫോട്ടോ വരദരാജന്‍ കാട്ടുകയുമുണ്ടായത്രേ. തന്നെയുമല്ല, കോപ്പിയൊരെണ്ണം ചെന്നതിന്റെ അന്നുതന്നെ അയച്ചുകൊടുക്കാമെന്ന് കയ്യില്‍ പിടിച്ച് സത്യവും ചെയ്തിരുന്നു പോല്‍ .

മാഞ്ചിയം, സി.പി.എമ്മിന്‌ ഓഞ്ചിയമെന്നതുപോലെ, കാര്‍ന്നോര്‍ക്കു എന്തൊക്കെയായെന്നതു അവിടെ നില്‍ക്കട്ടെ, മകരത്തിലെ കൊയ്ത്തു കഴിഞ്ഞാണ്‌ സ്ഥലം വിറ്റതെന്നതിനാല്‍ അക്കൊല്ലം അരിക്കു ക്ഷാമമുണ്ടായിരുന്നില്ല. എങ്കിലും, കൂട്ടാനില്‍ വറ്റു മുക്കിത്തിന്നു ശീലമുള്ള തറവാടികള്‍ കറിയുടെ കാര്യത്തിനു ലേശം ബുദ്ധിമുട്ടിയേനെ. എന്നാല്‍ , ജന്മവൈകല്യമായി ബുദ്ധികൂടിപ്പോയതിന്റെ ശല്യമുള്ളതുകൊണ്ടും, പടിഞ്ഞാറ് കുളിമുറിക്ക് ചേര്‍ന്ന അമ്മച്ചിപ്ലാവിനു ചെന പിടിച്ചതിന്റെയും കാരണമായി, അക്കൊല്ലം തൊട്ടതിനൊക്കെ ചക്ക കൊണ്ട് അഭിഷേകമായിരുന്നുവെന്നത് ചരിത്രത്തില്‍ രേഖപ്പെടുത്തിയിരിക്കുന്നു. കുടുംബം മുഴുവന്‍ മലക്കുപോവാന്‍ മാലയിട്ടെന്നപോല്‍ വെജിറ്റേറിയനായതിന്റെ കേടു മുഴുവന്‍ മീന്‍‌കാരന്‍ കുഞ്ഞാലിക്കും അറവുകാരന്‍ മാപ്ലക്കുമായിരുന്നുവെന്നു മാത്രം. ഉപ്പുചേര്‍ത്ത് വേവിച്ച് കടുകു വറുത്തിട്ട് തോരന്‍ ,ചതച്ചു വേവിച്ചതില്‍ തൈരുമൊഴിച്ച് പുളിങ്കറി, ശര്‍ക്കരപ്പാവും ഏലം പൊടിച്ചതും ചേര്‍ത്ത് പായസം, ചുട്ട കുരുകൊണ്ട് പാചകവാതകം എന്നു വേണ്ട, ചക്കകൊണ്ട് ഇനി വേറൊന്നിനും കൊള്ളുകയില്ലെന്ന നിലയുമായി!

കമ്മ്യൂണിറ്റി മെഡിസിന്‍ ടൂറു കഴിഞ്ഞ് ബാംഗ്ളൂരു നിന്നും നേരെ വീട്ടിലേക്കു പോയപ്പോഴാണ്‌ കമല വിവരമറിയുന്നതും വിഷണ്ണനാവുന്നതും. പത്തിനൊന്നെന്ന കണക്കായിരുന്നു പെണ്‍കുട്ടികളെന്നതിനാല്‍ കമലയുടെ നഖം മിക്കവാറും ഇച്ഛാഭംഗം തിന്നു തീര്‍ന്നു പോയുമിരുന്നു. ആയതിനാല്‍ അച്ഛന്‍ കാണ്‍കെ വിരലും കടിച്ച് നാലു ചാണ്‍ നടന്നുവെന്നല്ലാതെ കമലയെക്കൊണ്ട് വേറൊന്നിനും പറ്റുമായിരുന്നില്ല. പക്ഷെ, ശ്മശ്രുഗമനനായതു മുതല്‍ക്കേ വികാരത്തള്ളിച്ചയുടെ സമയത്തൊക്കെ ചെയ്യാറുള്ളതു പോലെ, ചിന്താമഗ്നനായ കമല, കുന്നിന്‍ മുകളിലുള്ള പാലമരത്തിന്റെ വേരില്‍ ഒറ്റയ്ക്കു പോയിരുന്നു. അസ്തമയത്തിനു മുന്നേ കൂടണയാന്‍ പോവുന്നേരം ഇണയെത്തിരഞ്ഞ് കുരുവികള്‍ കലപില കൂട്ടുന്നതു കണ്ടപ്പോള്‍ കമലയ്ക്കു കരച്ചില്‍ വന്നു. താഴ്‌വാരങ്ങളിലേക്ക്‍ ഇരുട്ടുമായെത്തുന്ന നനുത്ത കാറ്റ് കവിള്‍ത്തടങ്ങളെ നക്കിയുണക്കുമ്പോള്‍ നരച്ച ആകാശത്ത് മടിച്ചുമടിച്ച് നക്ഷത്രങ്ങള്‍ വിരിയുന്നതും നോക്കി കമല ഏറെ നേരമിരുന്നു. രാവേറെയായപ്പോള്‍ തിരിച്ചുവന്ന് മുറിയില്‍ക്കയറി, വസ്ത്രം പോലും മാറാതെ, വിളക്കണച്ച്, മച്ചും നോക്കി കിടന്നു. പാതിരാത്രിയില്‍ എലിക്കുഞ്ഞുങ്ങള്‍ നെല്‍ച്ചാക്കുകള്‍ കരളുന്നതും പശുക്കള്‍ തൊഴുത്തില്‍ തിരിഞ്ഞുകിടക്കുന്നതുമെല്ലാം കേട്ട്‌ കമല അസ്വസ്ഥനായെങ്കിലും ഇലകളില്‍ മഞ്ഞുവീഴുന്നതിന്റെ ശബ്ദത്തില്‍ ലയിച്ചിരുന്ന്‌ എപ്പോഴോ ഉറങ്ങിപ്പോവുകയും ചെയ്തു.

ആരെയുമുണര്‍ത്താതെ, വെളുക്കും മുമ്പേ സ്‌റ്റേഷനില്‍ചെന്ന്‌ വൈകിയോടുന്ന ഏതോ ഒരു വണ്ടിയില്‍ക്കയറി കമല പിറ്റേന്നു തന്നെ ഹോസ്റ്റലിലെത്തി. പ്ലാസ്റ്റിക്ക് ചാക്കിലിട്ടുകെട്ടി തട്ടിന്‍ പുറത്ത്‌ പഴുക്കാന്‍ വെച്ച വാഴക്കുല പോലെ മനസ്സ് വിങ്ങുന്നുണ്ടെങ്കിലും, പോലീസിനു കീഴടങ്ങുന്ന രാമലിംഗരാജുവിനെപ്പോലെ ഒന്നും പുറമേക്കാട്ടാതെ കമല ഹിന്ദിക്കാരുടെ മുറിയില്‍ച്ചെന്നിരുന്നു. കൊല്ലത്തിലൊരിക്കല്‍ മാത്രം വീട്ടില്‍ പോവാറുള്ള ഗോസായിമാര്‍ കമലയുടെ ചങ്ങാതിമാരെന്നതില്‍ക്കവിഞ്ഞ് കമല അവരുടെ ചങ്ങാത്തത്തിലായിരുന്നുവെന്നാണ് പലരും അടക്കം പറഞ്ഞിരുന്നത്. അടക്കത്തിലോ ഉറക്കെയോ ഇനിയിപ്പോള്‍ തമിഴില്‍ തന്തയ്ക്കു തന്നെ പറഞ്ഞാലും 'ക്യാ' എന്നു പറഞ്ഞു ചിരിച്ചോണ്ടു പോവുന്ന ശര്‍മ്മയായിരുന്നു എപ്പോഴും കമലയുടെ സോഫ്റ്റ് ടാര്‍ഗറ്റ്. അന്നു മുറിയില്‍ ചെന്നപ്പോള്‍ , മുപ്പതു ദിവസം കൊണ്ടു മലയാളം പഠിക്കാനുള്ള റാപ്പിഡെക്സുമായി ചമ്രം പടിഞ്ഞിരിക്കുന്ന ശര്‍മ്മയെ, കമല ഹിപ്‌നോട്ടിസം ചെയ്തു ശരിപ്പെടുത്തി. ഫൈനല്‍ ഇയര്‍ പോസ്റ്റിങ്ങിനു മുമ്പുള്ള ഒരാഴ്ചയങ്ങനെ, യാതൊരു ശല്യവുമില്ലാതെ കമല ഹിന്ദി പഠിച്ചു; ഗോസായിമാരെപ്പോലെ കുളിക്കാതെ സെന്റുപൂശി നടക്കാനിറങ്ങാനും കക്കൂസില്‍ പോയാല്‍ വെള്ളമൊഴിക്കാതെ ഇറങ്ങിപ്പോരാനും പഠിച്ചു. ഇടവഴിയിലൂടെ തിങ്ങിഞെരിഞ്ഞോടുന്ന പാണ്ടിലോറിയില്‍ കമ്യൂണിസ്റ്റ് പച്ചയും ശീമക്കൊന്നയും പറ്റിപ്പിടിക്കുന്നപോലെ കുറച്ചു വാക്കുകള്‍ പഠിച്ചുവെന്നല്ലാതെ ശര്‍മ്മയുടെ മലയാളം കൊങ്ങിണിയായി എന്നു ചുരുക്കം.

അങ്ങനെ ഒഴിഞ്ഞ ഹോസ്റ്റലില്‍ , ചോദിക്കാനും പറയാനും ആരുമില്ലാത്ത ഒരാഴ്ച കമല മിഥുന്‍ ചക്രവര്‍ത്തിയേയും ഡിമ്പിള്‍ കപാഡിയയെയും സ്‌നേഹിച്ച്‌, അമരീഷ് പുരിയോട് കലഹിച്ച് മദിച്ചുനടന്നു. ഹിന്ദി സിനിമയിലേതു പോലെ തന്നെ, നടന്നുകൊണ്ടിരിക്കെ കമല നിലം മറന്നു, മാഞ്ചിയം മറന്നു, ബാംഗ്ലൂരു പബ്ബിലെ വെയിറ്റ്രസിനെ മറന്നു. അടി മുതല്‍ മുടി വരെ ഹിന്ദിയുമായി നടന്ന കമലയുടെ മാറ്റു തെളിയണമെങ്കില്‍ ക്ലബ്ബ് കൂടേണ്ട താമസമേയുള്ളൂ എന്ന മട്ടായി.

അങ്ങനെ തിങ്കളാഴ്ചയായി. പോയവരൊക്കെ വിശേഷങ്ങളുമായി തിരികെ വന്നു. വൈകിട്ട് കമലകബ്ബിന്റെ അടിയന്തിര മീറ്റിങ്ങുണ്ടാവുമെന്ന അറിയിപ്പ് കാതുകളില്‍ നിന്നു കാതുകളിലേക്കെത്തി. കമലയ്ക്ക് ഗൈനക്കോളജിയിലായിരുന്നു പോസ്റ്റിങ്ങ്. എട്ടു മണിക്കു തുടങ്ങുന്ന ഓ.പി.യില്‍ ഷാര്‍പ്പ് പത്തുമണിക്കു കയറിച്ചെന്നതില്‍ പ്രൊഫസര്‍ക്കുണ്ടായ വാത്‍സല്യം കമല മുഖവിലയ്ക്കെടുത്തില്ല. ഫൈനല്‍ ഇയര്‍ ആയതിന്റെ ഗൌരവം മുഖത്തു നിന്നു മായാതിരിക്കാന്‍ പ്രത്യേകം ശ്രദ്ധവെച്ചിരുന്നുവെന്നു പറയേണ്ടതില്ലല്ലോ. ആദ്യദിവസം തന്നെ തിളങ്ങാനൊത്താല്‍ ഭാവിയിലേക്കത് മുതല്‍ക്കൂട്ടാവുമെന്നറിയാവുന്ന കമല ചാന്‍സുകിട്ടാന്‍ തക്കം പാര്‍ത്ത് കാ‍ത്തിരുന്നു. എന്നാല്‍ , ഹനുമല്‍‍ സേവയുള്ള കമലയ്ക്കൊത്തതൊന്നും ഗൈനക്കോളജി ഓ.പി.യില്‍ തരമായില്ല. കോട്ടുവായിട്ടും, കോട്ടിന്റെ പോക്കറ്റില്‍ കാണാതെപോയതെന്തോ തെരയുന്ന പോലെ കാണിച്ചും, ആരുവിളിച്ചാലും ഇടക്കിടെ ചായകുടിക്കാനിറങ്ങിയും കമല നേരം കൂട്ടി. പക്ഷേ, മണ്ടയ്ക്കു വീഴാനുള്ളതു മുണ്ടക്കയത്തു ചെന്നാലും മേട്ടമായിട്ടെങ്കിലും കിട്ടുമെന്നു പറഞ്ഞപോലെ, ഒരുമണിയടുപ്പിച്ച് ഒരു സംഭവമുണ്ടായി.

കാന്റീനിലെ സമോവറിലെ അവസാനത്തെ തുള്ളിയും ഊറ്റിക്കുടിച്ച് അറ്റന്‍ഡന്‍സ് പറയാന്‍ ചെന്ന കമല കാണുന്നത്‌ ഒരു മേശക്കു ചുറ്റും പീ.ജി.യുടെ കൂടെ പിള്ളേര്‍ തിക്കിത്തിര്ക്കുന്നതാണ്‌. തിളയ്ക്കുന്ന സാമ്പാറില്‍ വീണ മോതിരമെടുക്കാനെന്ന മട്ടില്‍ തുഴഞ്ഞു നോക്കുന്നതല്ലാതെ ഒരുത്തനും അടുക്കുന്നില്ല. ഇന്ററെസ്റ്റില്ലാതെ കമല തിരിഞ്ഞു നില്‍ക്കാന്‍ തുടങ്ങുമ്പോഴാണ്‌ വിളറിയ ശബ്ദത്തില്‍ ' പതാ നഹീ, ഡോക്ടര്‍ സാബ്' എന്നൊരു അശരീരി മുഴങ്ങുന്നത്. അപ്പോള്‍ അതാണു കാര്യം. പൊതിക്കാത്ത തേങ്ങ ഗുജറാത്തിലെ വെള്ളപ്പൊക്കത്തിലാണു വന്നിരിക്കുന്നതെന്നു കമലയ്ക്കു മനസ്സിലായി.

അനുഭാവപൂര്‍‌വം മുന്നോട്ടു ചെന്ന കമല കാണുന്നത് രണ്ട് ഈര്‍ക്കിലികള്‍ക്കിടയില്‍ ചെറുനാരങ്ങ കെട്ടിവച്ചിരിക്കുന്നതു പോലെ നിന്നു പരുങ്ങുന്ന ഒരു കോലത്തെയാണ്‌. പട്ടിണി കിടന്നതു കാരണം ഉണ്ടക്കണ്ണുകളും വയറും മാത്രമേ മുഴച്ചു കാണാവൂ. മാസമടുത്തപ്പോള്‍ ആരോ ബസ്സില്‍ കയറ്റി മെഡിക്കല്‍ കോളേജിലെത്തിച്ചതാണ്‌. ഭാഷയറിയാത്തതു കാരണം നിന്നു കുഴങ്ങുകയാണു ടി പ്രതിയും വക്കാലത്തുകാരും. കമലയ്ക്കു ചിരി വന്നു. ഫോറം പൂരിപ്പിക്കേണ്ട ഫസ്റ്റ് ഇയര്‍ പീ.ജി.യും ഫൈനല്‍ ഇയര്‍ കിടാങ്ങളും എങ്ങനെയൊക്കെ ചോദിച്ചിട്ടും മാസമുറയുടെ തീയതിയോ മാസക്കണക്കോ കിട്ടുന്നതുമില്ല.

ഇവരെയൊക്കെ എങ്ങനെ കൈകാര്യം ചെയ്യണമെന്നു ശരിക്കു നിശ്ചയമുള്ള കമല നെഞ്ചുവിരിച്ച് മുന്നോട്ടു ചെന്നു. ഇവനിതെന്താണു ഭാവിച്ചിരിക്കുന്നതെന്നറിയാതെ ഡോക്ടര്‍മാരും ഇനിയേതു കശ്മലന്‍ എന്നു പെണ്‍കിടാവും വിചാരിക്കേ, സൌമ്യമായി കമല ഉവാച:

'ബെഹന്‍ജീ, ബോലിയേ,
ഉസ് മഹീനാ കിസ് ദിന്‍ മേം ഥാ?'

ദേഖോ, ഉസ് മഹീനാ....
കിസ് ദിന്‍ മേം ഥാ.... ഊം.. ഊം..?'

ചോദ്യം കേട്ട പെണ്ണ്‌ വിളറി നിലത്തു വീഴുകയും കിടന്നിടത്തു തന്നെ പ്രസവിക്കുകയും ചെയ്തു. എലിക്കുഞ്ഞിനെപ്പോലെ നവജാതന്‍ കരയുമ്പോള്‍ , ഹിന്ദിക്കാരി കടുപ്പത്തില്‍ വിളിച്ചു പറഞ്ഞത് നന്ദിസൂചക ശബ്ദമായിരുന്നെന്ന് കമല പിന്നീട് അവകാശപ്പെടും, ക്ലബ്ബ്‌ അത് അനുവദിച്ചുകൊടുക്കുകയും ചെയ്യും. അനസ്തീഷ്യയും അരയ്ക്കു ഞെക്കലുമില്ലാതെ പേറെടുത്ത കമല പീ.ജി.കളുടെയിടയിലും ക്ടാങ്ങളുടെയിടയിലും പേരെടുത്തുവെന്ന് പ്രത്യേകം പറയേണ്ടതില്ലല്ലോ!

കമല കഥകള്‍ ‍- വാല്യം അഞ്ച്- ഫാര്‍‌മക്കോപ്പിയ

2008-10-15T12:01:00.002+05:30

ഫാര്‍മക്കോളജി ലാബില്‍ ചീനപ്പാത്രത്തില്‍ കാര്‍മിനേറ്റീവ് മിക്സ്ചര്‍ കലക്കേണ്ടതായിരുന്നു കമല. നേരം ഊണുകഴിഞ്ഞ ഉച്ച, ഇരിപ്പ്‌ ഫാനിനു കീഴെ, ഗൗരവമില്ലാത്ത സംഗതിയെന്നതിനാല്‍ ലാബില്‍ സൂപ്പര്‍‌വിഷനു പീജിപ്പിള്ളേര്‍ മാത്രം.. അങ്ങനെ എല്ലാം ഒത്തുകിട്ടുകയെന്ന അസുലഭ ഭാഗ്യത്തിന്റെ തേരിലേറി കമല ഒന്നു മയങ്ങിപ്പോയെന്നത് നേര്‌.

ആര്‍ക്കും ഒരു ഉപദ്രവവും ഉണ്ടാക്കാതെ മരക്കസേരയില്‍ ചാഞ്ഞുകിടന്ന്‌, പഴയ തമിഴ് സിനിമയില്‍ വില്ലന്‍ വെടിയേറ്റു മലച്ചുകിടക്കുന്നപോലെ, കോട്ടിന്റെ പോക്കറ്റില്‍ കൈയുമിട്ടു വായും പൊളിച്ച് നിദ്രപൂണ്ടതായിരുന്നു കമല. തരുണീമണികള്‍ കലപിലകൂട്ടിക്കൊണ്ട് പിപ്പറ്റെടുത്ത് നിലത്തിട്ടതോ, കഷ്ണങ്ങള്‍ വാരി മുമ്പില്‍ കൊണ്ടിട്ടതോ കമല അറിഞ്ഞതുമില്ല.

സ്വതസിദ്ധമായ ശൈലിയില്‍ കൂര്‍ക്കം വിട്ടുകൊണ്ട്‌ ഉറങ്ങിയ കമല ഉറക്കമുണര്‍ന്നത് മുഖത്ത് മഴ പെയ്യുന്നതായി സ്വപ്നം കണ്ടപ്പോഴാണ്‌. മഴയുടെ കൂടെ മിന്നലും ഇടിവെട്ടുമുണ്ടായിരുന്നുവെന്നു മാത്രം. വയറുനിറച്ച് ചീത്തയും കൊടുത്തുകൊണ്ട് പ്രൊഫെസ്സര്‍ ലാബില്‍ നിന്നും ഇറക്കിവിട്ടപ്പോള്‍ കമലയ്ക്ക് ഒന്നും മനസ്സിലായില്ല. ക്ലബ്ബിന്റെ മാനംകാക്കാന്‍ വേണ്ടി, ഇറക്കി വിട്ടതല്ല, പാസ്റ്റ് പെര്‍ഫെക്‍റ്റ് കണ്ടിന്യുവസ് ടെന്‍സില്‍ , സ്വയം ഇറങ്ങിപ്പോന്നതാണെന്നു വരുത്തി, അഭിമാനത്തോടെ, കണ്ണും തിരുമ്മി നെഞ്ചും വിരിച്ച് ഇറങ്ങിയ കമലയ്ക്ക്, ഇരുന്നുറങ്ങിയതിനു മാത്രല്ല, ഉപകരണമുടച്ചതിനു കൂടിയാണു ശിക്ഷയെന്നതു പിന്നീടാണു മനസ്സിലായത്.

ചായവെള്ളം തിളക്കുന്നതിനു മുന്‍പ് മെസ്സില്‍ ചെന്നതിന്, മനസ്സില്‍ തെറിവിളിച്ചുകൊണ്ടാണെങ്കിലും, ചോറു പാത്രം മോറുന്നതു നിര്‍ത്തി അന്ത്രുമാന്‍ കുശലവുമായി കുണുങ്ങിയെത്തി. 'ഓ, പ്രാക്റ്റിക്കല്‍ ഇന്നു നേരത്തെ തീര്‍ന്നു' വെന്ന ഒഴുക്കന്‍ മട്ടിലുള്ള മറുപടി, 'എന്നിട്ടു മറ്റുള്ളോരേടെ' എന്നു തുടങ്ങുന്ന ചോദ്യങ്ങള്‍ക്കു വഴി തെളിക്കുമെന്നറിയാമായിരുന്നതിനാല്‍ ‍, കമല ഇറങ്ങി പോര്‍ട്ടിക്കോയില്‍ ചെന്നിരുന്നു. രാവിലെ, തിയറിക്ലാസില്‍ പോവാതെ, വായിച്ചു മന:പാഠമാക്കിയ ദിനപത്രങ്ങളിലൂടെ ഒരാവര്‍ത്തി കൂടി കണ്ണോടിച്ചുവെന്നല്ലാതെ,ഒന്നിലും മനസ്സുറക്കാതെ, ആകെക്കൂടി ച്യൂയിങ്ഗം വിഴുങ്ങിയ തവളയെപ്പോലെയുള്ള അവസ്ഥയുമായി, പിന്നീട് കമല ഫോണ്‍ റൂമില്‍ ചെന്നിരുന്നു. മാഞ്ചെസ്റ്ററുകളായ ലലനമാര്‍ , അപൂര്‍ണ്ണ ശ്മശ്രുക്കളായ പൂവന്‍‌മാരെ വിളിക്കാനുള്ള സമയം ആവുന്നതേ ഉണ്ടായിരുന്നുള്ളൂവെന്നതിനാല്‍ യതൊരു ഉല്‍ക്കണ്‌ഠയുമില്ലാതെ, വെറുതെ റിസീവറെടുത്ത് വല്ല ശൃംഗാരവും റൂട്ടു മാറി വരുന്നുണ്ടോയെന്നറിയാന്‍ ചെവിയോര്‍ക്കവേയാണു കമലയുടെ മുതുകത്ത് ഒരു മുന്നറിയിപ്പുമില്ലാതെ ആ കൈ‍ പതിഞ്ഞത്. കള്ള ഫോണ്‍ പിടിക്കാന്‍ വാര്‍ഡന്‍ വന്നതാണെന്നു കരുതി ഞെട്ടിത്തിരിഞ്ഞ കമല നിമിഷങ്ങള്‍ക്കകം മനസ്സാന്നിധ്യം വീണ്ടെടുത്തു പൂര്‍‌വ്വാശ്രമം പ്രാപിക്കുകയും ചെയ്തു.

തഥാഗതന്‍ , പ്രൈവറ്റ് ആശുപതികളിലേക്ക് നൈറ്റ് ഡ്യൂട്ടിക്കു ഡോക്ടര്‍മാരെ ഏര്‍പ്പാടു ചെയ്ത് കമ്മീഷന്‍ പറ്റി കാലം കഴിച്ചു പോന്ന ഒരു പരാന്നഭോജിയായിരുന്നു, പരം‌പരാഗണത്തില്‍ അഗ്രഗണ്യനുമായിരുന്നു; അക്കഥ വേറെ. ദൂരെയൊരിടത്ത് ഒരാശുപത്രിയിലുള്ള ഡോക്ടര്‍ക്കു അത്യാവശ്യമായി എങ്ങോട്ടോ പോവണമെന്നതിനാല്‍ രാത്രി ആളെ വേണം, നോക്കിയിട്ട് കോഴ്സ് കഴിഞ്ഞവരെയോ സ്ഥിരമായി പോവുന്നവരെയോ കിട്ടാനുമില്ല എന്ന സ്ഥിതി. വല്ലവനും പനിച്ചുകിടക്കുന്നുണ്ടെ‍ങ്കില്‍ ഉന്തിത്തള്ളി വിടാമെന്നു കരുതിയാണു അല്പകായന്‍ ‍, അനോണിമസ്, വന്നിരിക്കുന്നത്. സ്വതവേ മൂഢനെപ്പോലെയും ഇപ്പോള്‍ ഇതികര്‍ത്തവ്യനുമായുമിരിക്കുന്ന കമല തന്നെ പറ്റിയ കാന്‍ഡിഡേറ്റെന്നു ടിയാന്‍ തീര്‍ച്ചപ്പെടുത്തുകയും ചെയ്തു.

തികഞ്ഞ ഗൗരവത്തോടെ, താനിതൊക്കെ എത്ര പോയിരിക്കുന്നുവെന്ന മട്ടില്‍ , പോകാന്‍ താല്പര്യമില്ല, നിര്‍‌വാഹവുമില്ലായെന്നു്‌ പേര്‍ത്തും പേര്‍ത്തും പറഞ്ഞത്‌ ഒടുവില്‍ കമലയ്ക്കു തന്നെ വിനയാവുകയും ചെയ്തു. അറിയാത്തപിള്ളയെ മാത്രമല്ലേ ചൊറിഞ്ഞു പഠിപ്പിക്കേണ്ടതുള്ളൂ എന്ന തത്വശാസ്ത്രത്തിന്റെ വക്താവായ അല്പകായന്‍ , ഇവന്‍ തന്നെ ഇരയെന്നു തീരുമാനിച്ചുറപ്പിച്ചു. ഒട്ടുനേരത്തെ ശ്രമഫലമായി, ഒട്ടും രോഗികളുണ്ടാവില്ല, ഉറക്കത്തിനു യാതൊരു അല്ലലുമുണ്ടാവില്ല, പോരുമ്പോള്‍ രാവിലെ എണ്ണൂറു രൂപ കൈയില്‍കിട്ടും എന്നുമൊക്കെയുള്ള പ്രലോഭനങ്ങളില്‍ ‍‌, ഇലക്ഷന്‍ മാനിഫെസ്റ്റോ വായിച്ച് വോട്ടിനു പോവുന്ന മിഡില്‍ക്ലാസ്സിനെപ്പോലെ, കമല വീണുപോയി.

അഞ്ചുമണിക്കുള്ള കോളേജുബസ്സില്‍ , വസന്ത പിടിച്ച കോഴിയെപ്പോലെ ഒരുകോണില്‍ ഒറ്റയ്ക്കു മാറിയിരുന്ന്, ചോദ്യശരങ്ങളൊഴിവാക്കിക്കൊണ്ട് തൊട്ടും തൊടാതെയും‌ കമല പുതിയ സ്റ്റാന്‍ഡിലെത്തി; ലൈന്‍ ബസ്സുപിടിച്ച് ഏഴരയോടെ സംഭവസ്ഥലത്തുമെത്തി.

പൂച്ചെണ്ടും, നാരങ്ങാവെള്ളവുമൊക്കെയായി ഉപചാരപൂര്‍‌വ്വം ആനയിക്കപ്പെടുമെന്നു കരുതി വാതില്‍ക്കല്‍ കാത്തുനിന്ന കമലയ്ക്ക്, നിമിഷങ്ങളോളം, അപമാനിക്കപ്പെട്ടതായിത്തോന്നി. കമലക്ലബ്ബിന്റെ അഭിമാനസ്തംഭം, തിരിച്ചിങ്ങു പോരാന്‍ , പാതിദൂരം പിന്നിട്ട മൈക്കിള്‍ ഫെല്‍‌പ്സിനെപ്പോലെ, പടി ചവിട്ടിയുന്തി തിരിയവേയാണു 'എന്താ വേണ്ട്യേ' എന്ന ചോദ്യത്തോടെ ഒരുത്തന്‍ വന്നു വിളിക്കുന്നതും ക്ഷമാപണത്തോടെ കൂട്ടിക്കൊണ്ടു പോവുന്നതും. മെഡിക്കല്‍ കോളേജിലെ ഡോക്ടറാണ്‌ വരികയെന്നു കരുതിയതാണ്‌, ആളു മാറിപ്പോവാനും തന്മൂലമുള്ള മാപ്പു പറച്ചിലിനും ഹേതുവായതത്രെ. അത്രെ തത്രെ, ഇപ്പോള്‍ വേണ്ട, എന്നാല്‍ ,പോവുന്നതിനുമുന്‍പ് താന്‍ തന്നെ ഇവനെ മര്യാദ പഠിപ്പിക്കേണ്ടി വരുമെന്ന് കമല മനസ്സില്‍ നോട്ടു ചെയ്യുകയും ചെയ്തു. അതായത്‌ കമല സുസ്മേര വദനനായിക്കാണപ്പെട്ടുവെന്നര്‍ത്ഥം.‍

ഒമ്പതര മണിവരെ കാര്യങ്ങള്‍ സ്‌മൂത്തായിപ്പോയതില്‍ കമലയ്ക്ക് ചെറിയതോതില്‍ സന്തോഷം തോന്നാതുമിരുന്നില്ല. ഇടയ്ക്കു വന്ന രണ്ടുകേസുകള്‍ വിജയകരമായി കൈകാര്യം ചെയ്തു വിട്ടത് കമലയുടെ ആത്മവിശ്വാസത്തെ ഒട്ടൊന്നുമല്ല പൊലിപ്പിച്ചത്. അമോക്സിസിലിനും പാരസെറ്റമോളുമൊക്കെയായി പ്രിസ്‌ക്രിപ്‌ഷനില്‍ അതു പ്രതിഫലിച്ചത്‌ ഫാര്‍മസിസ്റ്റിനേയും, തദ്വാര മുതലാളിയേയും സന്തോഷിപ്പിച്ചുവെന്നതു കമലയ്ക്ക്‌ അനര്‍ഗ്ഗളമായ ആഹ്ലാദം നല്‍കി. ഹോസ്റ്റലില്‍ നിന്നിറങ്ങുമ്പോള്‍ മഞ്ജിഷിനോട് കാര്യങ്ങള്‍ ചോദിച്ച് മന‍സ്സിലാക്കിയതിലും അതു ക്ലിക്കു ചെയ്തതിലും സംതൃപ്തനായ കമല, ഇത്രയും കാലം ഇതില്‍ ഏര്‍പ്പെടാന്‍ തോന്നാഞ്ഞത് തികഞ്ഞ അരാജകത്വമായിപ്പോയെന്ന ഒരു പ്രബന്ധം, ക്ലബ്ബില്‍ അവതരിപ്പിക്കുന്നതിനായി, മനസ്സില്‍ ഡ്രാഫ്റ്റ് ചെയ്യുകയും ചെയ്തു.

പിന്നീട് അയിലക്കറിയും ചോറും തിന്ന്‌ മുകളിലോട്ടു പോയ കമല, ജനല്‍ തുറന്നു പാടത്തെയും, വെള്ളിനിലാവത്ത് പരല്‍മീനുകള്‍ പുളയ്ക്കുന്ന പുഴയേയും നോക്കി തെല്ലിട നിര്‍ന്നിമേഷനായി നിന്നു. നിലാവും പാടവും ഇളം‌കാറ്റും, വിരിഞ്ഞുലയുന്ന നെല്‍ക്കതിരുകളും, നിറഞ്ഞ വയറും തന്നെ ഒരു കവിയാക്കി മാറ്റിയേക്കുമെന്ന ശങ്ക മൂത്തുവന്നപ്പോള്‍ , ക്ലബ്ബിന്റെ അമരക്കാരനായ താന്‍ തരളിതനായിക്കൂടാ എന്നു കരുതി, വിഷയം മാറ്റാനായി, കമല താഴെ കാഷ്വാല്‍റ്റിയിലേക്കു പാളി നോക്കി. നൈറ്റ്ഷിഫ്റ്റിലുള്ള സിസ്റ്റര്‍മാര്‍ ‍, മംഗളത്തിന്റെ മിടിക്കുന്ന പേജുകള്‍ വിറയാര്‍ന്ന ചുണ്ടുകള്‍ക്കുള്ളില്‍ ചവച്ചരച്ചു തിന്നുന്നതു കണ്ടപ്പോള്‍ , കമല അസ്വസ്ഥനായി. ലൈറ്റണച്ച് കിടന്നു, കിടന്നു കൊണ്ട് ശൈലീഭംഗമില്ലാതെ കൂര്‍ക്കം വലിയും തുടങ്ങി.

പുലര്‍ച്ചെ നാലു മണിക്കു ശബ്ദം കേട്ടു ജനലില്‍ക്കൂടി താഴോട്ടു നോക്കിയ കമല കാണുന്നത്‌ ഒരു ജീപ്പു നിറയെ പുരുഷാരം കാഷ്വാല്‍റ്റിയിലേക്കു ആരെയോ പൊക്കിപ്പിടിച്ച് കുതിക്കുന്നതാണു്‌. ചെന്നപ്പോള്‍ , എന്തോ കുഴപ്പം പിടിച്ച കേസാണ്‌, നോക്കിയിട്ട്, ഒരെത്തും പിടിയും കിട്ടുന്നുമില്ല. ഒരു വിവരവുമില്ലാത്ത തേര്‍ഡ് ഇയര്‍ വിദ്യാര്‍ത്ഥിയാണു താനെന്നറിഞ്ഞാല്‍ ബോധം കെട്ടുകിടക്കുന്ന രോഗി കൂടി തല്ലാനെണീക്കുമെന്ന ബോധ്യമുള്ള കമല, പാരസെറ്റമോള്‍ ഇഞ്ചക്ഷന്‍ കൊടുക്കാന്‍ സിസ്റ്ററോടു തഞ്ചത്തില്‍ പറഞ്ഞ്, ചോദ്യോത്തരങ്ങള്‍ക്കു നില്‍ക്കാതെ, വെളിക്കിരിക്കാന്‍ മുട്ടിയ അതിസാര രോഗിയെപ്പോലെ റൂമിലേക്കു പാഞ്ഞു............

ആയുസ്സിന്റെ ബലം കൊണ്ടോ, എക്സ്പീരിയെന്‍സുള്ള നേഴ്സിന്റെ മിടുക്കു കൊണ്ടോ, അതോ ഓടുന്ന വഴി കമല നേര്‍ന്ന നേര്‍ച്ചകളുടെ ഗുണം കൊണ്ടോ എന്നറിയില്ല, ബോധം വീണ്ടു കിട്ടിയ രോഗിയെ വീട്ടില്‍ ‍കൊണ്ടു പൊയ്‌ക്കോട്ടേയെന്നു ചോദിക്കാന്‍ ലേശം കഴിഞ്ഞ് ചെന്ന ബന്ധുക്കളോ, നേഴ്സുമാരോ, വാച്ചുമാനോ എവിടെയൊക്കെ നോക്കിയിട്ടും, എത്രയൊക്കെ വിളിച്ചിട്ടും ഡോക്ടറെ കണ്ടെത്താന്‍ കഴിഞ്ഞില്ല.

...അഞ്ചരക്കു വന്ന ഫോണിനു മറുപടിയായി ശുഷ്‌കകായന്‍ അനോണി ‍ ഇങ്ങനെ പറഞ്ഞു: 'ഹൈയ്, നിങ്ങള്‍ ഒന്നുകൊണ്ടും പേടിക്കണ്ടന്നേയ്, ഡോക്ടര്‍ സെയ്‌ഫായി ഇവ്‌ടെ എത്തീന്ന്... ഞാന്‍ വിജാരിച്ച്‌ ഏതോ പട്ടിക്കാട്ടു മൂലേണെന്ന്‌ , പക്ഷേങ്കില്‌ കൊച്ചുവെളുപ്പാന്‍ കാലത്തൂന്നെ ഇഷ്ടം പോലെ ഓട്ടോര്‍ഷയൊക്കെ കിട്ടൂലോ അവ്‌ടെ! ...സാരോല്ല, ഓട്ടോക്കാശ് ഞാന്‍ കൊടുത്ത്ണ്ട് ട്ടാ... ഇനീപ്പോ ഡോക്ടര്‍ക്കു വേണ്ടി നിങ്ങ അന്വോഷിച്ച് അധികം നട്ടം തിര്യേണ്ട......പോയിക്കെടന്ന് ഒറങ്ങാന്‍ നോക്ക് ! '

കമല കഥകള്‍ - വാല്യം രണ്ട് നടന നൈപുണ്യം

2008-09-20T22:36:00.000+05:30

"ട്ഠപ്പേ!"
ഓര്‍ക്കാപ്പുറത്ത് ചെകിട്ടത്ത് അടി വീണപ്പോള്‍ കമലയ്ക്കു കണ്ണില്‍ പൊന്നീച്ച പാറി. പകച്ചുപോയ കമല, പടക്കം പൊട്ടിക്കാന്‍ ലേഡീസ് ഹോസ്റ്റലിനു മുമ്പില്‍ച്ചെന്നപ്പോള്‍ ലുങ്കിക്കു തീപ്പിടിച്ച സ്വതന്ത്ര സ്ഥാനാര്‍ത്ഥിയെപ്പോലെ, സര്‍‌വ്വം മറന്നു ചാടിപ്പോയി. പ്രിന്‍സിപ്പാളിന്റെ റൂമാണ്, വിചാരണ നടക്കുകയാണ് എന്നുള്ള കാര്യങ്ങളെല്ലാം വിസ്മരിച്ച് കഥാപുരുഷന്‍ , പിടുത്തം വിട്ട്, സോഡാക്കുപ്പി പൊട്ടിക്കുന്ന ശബ്ദത്തോടെ ഒന്നു വിതുമ്പുകയും ചെയ്തു. താഡനം കണ്ടു സ്‌തബ്‌ധയായ പ്രിന്‍സിപ്പാളും കൊണ്ടകമലയും ബോധം വീണ്ടെടുക്കാന്‍ വൈകുമെന്നു നിനച്ച അടിയുടെ ഉടമയാവട്ടെ, മുണ്ടും മടക്കിക്കുത്തി റൂമില്‍നിന്നും ഇറങ്ങുകയും എസ്കേപ്പ് എന്ന ക്രിയ അനുഷ്ഠിക്കുകയും ചെയ്തു!

കഥ പുറകോട്ട്:

കമല ഒന്നാം ക്ലാസ് കഴിഞ്ഞിരിക്കുന്നു, രണ്ടാം ക്ലാസ്സ് ആയിട്ടുമില്ല. അതായത്, ഓടുന്ന ട്രെയിനിന്റെ കക്കൂസില്‍ കര്‍മ്മം ചെയ്യാനിരിക്കുന്ന പോലുള്ള പരുവം. അന്നൊക്കെ ഒന്നിനും രണ്ടിനുമിടയ്ക്ക് ആറുമാസമാണ് വെക്കേഷന്‍ . മെഡിക്കല്‍ കോളേജില്‍ വരുന്നതിനു മുമ്പ് അങ്ങനെയൊരു അവധിവ്യാപാരത്തെക്കുറിച്ച് കമല കേട്ടിട്ടു പോലുമില്ലായിരുന്നു. പരീക്ഷകളില്‍ പങ്കെടുക്കുകയെന്നല്ലാതെ അതിന്റെ റിസല്‍ട്ടിനെക്കുറിച്ച് യാതൊരു വിധ വേവലാതിയുമില്ലാത്ത കാലമാണെന്നോര്‍ക്കണം. മോഡറേഷന്‍ ഇല്ലാത്തതുകൊണ്ട് പാസ്സാവുമെന്ന പേടിയൊട്ടില്ല താനും. ചിക്കന്‍പോക്സ് എന്ന അസുഖത്തിന്റെ അപാരമായ സാധ്യതയില്‍ , ആരു ചോദിച്ചാലും 'വൈവയുടെ സമയത്ത് രോഗിയായിരുന്നു, അതുകൊണ്ടാണ് ' എന്ന സുഖകരമായമായ ഉത്തരവും നല്‍കി കമല മെസ്സും കഴിച്ച് ക്രൗണ്‍ ‍ തീയേറ്ററും ടെലിവിഷന്‍ ചാനലുകളും ഇറാഖ് യുദ്ധവുമൊക്കെയായി കാലം കഴിക്കുന്ന സമയം.

ക്ലാസ്സില്‍ പോവേണ്ടെങ്കില്‍ക്കൂടി, മാസാമാസം വീട്ടിലേക്കുള്ള പോക്കുവരവ് മുടക്കാതിരിക്കാന്‍ കമല ശ്രദ്ധ വെച്ചിരുന്നുവെന്നു പറയേണ്ടതില്ലല്ലോ. സെക്കന്‍ഡ് സാറ്റര്‍ഡേയ്ക്കു മുമ്പുള്ള വെള്ളിയാഴ്ച, വൈകിട്ടത്തെ മംഗളയ്ക്ക് ‌ കമല വീട്ടില്‍ച്ചെല്ലും. ചെല്ലുന്നതു തന്നെ അമ്മയുടെ കൈകൊണ്ടുണ്ടാക്കുന്ന ഭക്ഷണം കഴിക്കാനാണെന്നു വരുത്തിത്തീര്‍ക്കാന്‍ ‍, വിളമ്പുന്നതെന്തും പാത്രത്തോടെ വടിച്ചു തിന്നുകയും ചെയ്യും; ആക്‌റ്റിങ്ങാണെങ്കില്‍ക്കൂടി അതു വെടിപ്പായി ചെയ്യുകയെന്നത് കമലയുടെ രക്തത്തില്‍ അലിഞ്ഞു ചേര്‍ന്നതത്രെ! സ്വതവേ സംശയരോഗിയായ അച്ഛനെ ബോധിപ്പിക്കാന്‍ ‍, പിറ്റേന്ന് തേങ്ങയെണ്ണാന്‍ സഹായിച്ചോ, ഞാറു നടുന്നിടത്ത് വെള്ളം കൊണ്ടുകൊടുക്കാന്‍ പോയോ, സൈക്കിള്‍ കാരിയറില്‍ കന്നാസുമേറ്റി റേഷന്‍മണ്ണെണ്ണ വാങ്ങാന്‍ വൊളണ്ടിയര്‍ ചെയ്തോ കമല ഉത്സാഹിക്കും. ഒടുക്കം വൈകുന്നേരമാവുന്നതിനു മുന്‍പ് കണക്കു പറഞ്ഞ് അതിന്റെ കൂലിയും അമ്മാസത്തെ മെസ് ഫീയും വാങ്ങി റെക്കോഡ് വരക്കാനുണ്ട്, ഞായറാഴ്ച ഒന്നിനും നേരം കിട്ടാത്ത ദിവസമാണ് എന്നൊക്കെപ്പറഞ്ഞ് പാസഞ്ചര്‍ കേറി കോഴിക്കോട്ടെത്തും. അതാണു കാലഘട്ടം.

അങ്ങനെയൊരു രാത്രി, സാഗര്‍ ഹോട്ടലില്‍ നിന്നു ബിരിയാണിയും കഴിച്ച്, ക്യാമ്പസിലൂടെ പാട്ടും പാടി നടന്നു വരുമ്പോള്‍ , വിവരംകെട്ട ഏതോ ഒരു കാക്ക ഉന്നം തെറ്റിച്ച് ഒരിടത്ത് രണ്ടിനു പോയി. തലയില്‍ വീഴേണ്ടതു ഷര്‍ട്ടിലായതിനാല്‍ അലക്കേണ്ടി വരുമെന്നതിന്റെ വൈഷമ്യത്തില്‍ , കമല, കാക്കയുടെ തന്തക്കു വിളിച്ചുവെന്നതു ശരി തന്നെ, പക്ഷേ ശരിക്കുമമ്പരന്നതു വേറൊരു കാര്യം കൊണ്ടാണ്. മറുപടിയായി സ്ത്രീശബ്ദത്തില്‍ 'പോടാ പട്ടീ'യെന്ന അശരീരി എവിടുന്നാണു വന്നതെന്നു ഇരുട്ടത്ത് കമലയ്ക്കു മനസ്സിലായതേയില്ല. കണ്ണ്‌ തിരുമ്മി മേലോട്ടു നോക്കിയാല്‍ മിസൈലുകള്‍ വേറെയും വരുമെന്നറിയാവുന്ന കമലഹാസന്‍ , ആത്മസം‌യമനത്തോടെ നിലത്തു നോക്കിത്തന്നെ 'സംഗതി' ലേശം കൂട്ടി ഭക്തിഗാനം പാടിത്തുടങ്ങിയതും ലേഡീസ് ഹോസ്റ്റലിന്റെ സൈഡ്‌ഗേറ്റില്‍ മതിലും ചാരി ശൃംഗരിച്ചുകൊണ്ടു നിന്ന, തൊണ്ണൂറ്റൊന്നു മോഡല്‍ ഒരുത്തന്‍ ‍, നിഴലില്‍നിന്നു മാറി വെളിച്ചത്തോട്ടു വരികയും കമലയുടെ കൊങ്കയ്ക്കു പിടിക്കുകയും ചെയ്തു. കാമുകിയുടെ മുമ്പിലൊന്നു ഷൈന്‍ ചെയ്യാമെന്നു കരുതിയാണു കാര്യമറിയാതെ സിംഹവാലന്‍ പെരുമാറിയതെങ്കിലും, പെണ്ണൊരുത്തി മുമ്പില്‍ നില്‍ക്കുമ്പോള്‍ വിട്ടുകൊടുക്കുന്നതെങ്ങനെയെന്നു നിനച്ച് അഭിമാന ബോധമുള്ള കമല കൈമെയ് മറന്നൊന്നു കുതറി നോക്കി. കാര്യം വിശദീകരിക്കുവാന്‍ നേരം കിട്ടുന്നതിനു മുമ്പു തന്നെ സിംഹളന്‍ നിലത്തുവീഴുകയും പെണ്ണ് വാവിട്ടു നിലവിളിക്കുകയും ചെയ്തു.

ചുരുക്കിപ്പറഞ്ഞാല്‍ , കം‌പ്ലെയിന്റായി, എന്‍‌ക്വയറി ആയി, ഇനി ക്യാമ്പസില്‍ നില്‍ക്കണമെങ്കില്‍ അച്ഛനെ കൂട്ടിക്കൊണ്ടു വരണമെന്ന സ്ഥിതിയായി. അങ്ങനെ വേണ്ടി വന്നാല്‍‍ ഇനിയുള്ള കാലം നെല്‍‌പ്പാടത്ത്‌ കോലത്തിനു പകരമായി നിന്നു ജീവിതം കരിഞ്ഞു തീര്‍ക്കേണ്ടി വരുമെന്നറിയാവുന്ന കമല, സംഗതി ഒരാളോടൊഴികെ വേറാരോടും പറഞ്ഞില്ല. ആരോടെന്നുള്ളത്‌ അവിടെ നില്‍ക്കട്ടെ, എന്തു സംഭവിച്ചുവെന്നതാണു വിഷയം. ആ സംഭവത്തോടെ ഉപദേശി കമലക്ലബ്ബില്‍ ആജീവനാംഗത്വം നേടിയെന്നു മാത്രം പറഞ്ഞാല്‍ മതിയല്ലോ!

ഇരുചെവിയറിയാതെ മാസ്റ്റര്‍ പ്ലാന്‍ തയ്യാറാക്കിയ സംഘം മുണ്ടിക്കല്‍ത്താഴത്തെ ദേശബന്ധു വായനശാലയിലേക്കാണു നേരെ പോയത്. സജീവമായിരുന്ന അവരുടെ നാടക സംഘത്തില്‍ നിന്നും ഒരു അച്ഛനെ വിട്ടുകിട്ടുമോയെന്നറിയാനാണു യാത്ര. കൃശഗാത്രനും കണ്ടാല്‍ ഓമനത്വം തോന്നിക്കുന്നവനുമായ പുഷ്പാംഗദനെയാണു കമലയ്ക്കിഷ്ടപ്പെട്ടതെങ്കിലും നായ്ക്കന്‍ ആയതുകൊണ്ട് റേറ്റ് ഒക്കാഞ്ഞതിനാല്‍ ഉദ്യമം പാളി. അമ്മാവന്‍ വേഷം ചെയ്യുന്ന മൃതപ്രായനായ കാര്‍ന്നോരെക്കണ്ടാല്‍ ‍, പിടിച്ചുകൊണ്ടുപോയതിനു ശിക്ഷ വേറെക്കിട്ടുമെന്നറിയാവുന്നതിനാല്‍ അയാളെയും വേണ്ടെന്നു വച്ചു. തൊമ്മിയായി കൂടെപ്പോയ മാന്യദേഹമാവട്ടെ, കമലയ്ക്കു പറ്റിയ പെങ്ങളെയോ അമ്മയെയോ നോക്കാമെന്നു കരുതി അടുക്കളഭാഗത്തായിരുന്നു വിളയാട്ടം മുഴുവന്‍ .

ഇതിനിടെ, വെടിമരുന്നു നിറക്കാന്‍ പാറ തുരക്കുന്നതിന്റെയെന്ന പോലുള്ള ശബ്ദം മലയാളത്തില്‍ പുറപ്പെടുവിച്ചുകൊണ്ട്, മീശപിരിച്ച്‌‌ ആരെയോ തെറിപറഞ്ഞുകൊണ്ട്, ഒരാജാനുബാഹു കയറിവന്നു. മുത്തപ്പന്‍ കാവിലെ സെക്യൂരിറ്റിക്കാരന്റെ മാതിരി പ്രകൃതം; മണലരിക്കാന്‍ കൊണ്ടുവന്ന അരിപ്പയ്ക്ക്‌ ഓട്ട വീണതുപോലുള്ള മുഖത്തുനിന്നും കാരുണ്യം വഴിഞ്ഞൊഴുകുന്ന ഒരു ജെന്റില്‍മാന്‍‍ . ‍‍വില്ലാളിവില്ലന്‍ കമലയുടെ ശ്രദ്ധയാകര്‍ഷിച്ചുവെങ്കിലും, സ്വന്തം പോട്ടെ, ശത്രുവിന്റെ പോലും അച്ഛനായി സങ്കല്പിക്കാന്‍ പറ്റാത്ത ഐറ്റം ആയിരുന്നു ടിയാന്‍ ‍. പക്ഷേ, ശ്രമം പാളിയതോര്‍ത്തു വിഷണ്ണരായ അവരെ, വിവരമറിഞ്ഞ അയാള്‍ കടത്തി വെട്ടി. ഒരുദിവസത്തേക്കല്ലേ, താന്‍ അഡ്ജസ്റ്റ് ചെയ്തോളാം, കാശ്‌ അഡ്വാന്‍സായി തരേണ്ടിവരും എന്ന ചിന്ന കണ്ടീഷന്‍ മാത്രം. മനസ്സില്ലാമനസ്സോടെയാണെങ്കിലും നമ്മുടെ നായകന്മാര്‍ സമ്മതിച്ചു. പക്ഷേ. അതിബുദ്ധിമാന്മാരായ തങ്ങളെ പറഞ്ഞു പറ്റിച്ച്, കാശടിച്ചു മാറ്റാനുള്ള ശ്രമമാണെങ്കില്‍ , അതു നടപ്പില്ല, കൂലി റൊക്കം വായനശാല സെക്രട്ടറി ഏറ്റുവാങ്ങണം എന്നു കരാര്‍ തീര്‍പ്പാക്കി ഒപ്പുവയ്ക്കുകയും ചെയ്തു. പേശിപ്പേശി, പറഞ്ഞതിലും നൂറു രൂപ കുറച്ചുകൊടുത്ത് തിരികെപ്പോരുമ്പോള്‍ ആരാണ്ടോ പിറുപിറുക്കുന്നത് കേട്ടെങ്കിലും മനസ്സിലതു രെജിസ്റ്റര്‍ ചെയ്യാന്‍ മെനക്കെടാതെ ടീം ഹോസ്റ്റലിലെത്തി ലേറ്റ്മെസ്സിന്റെ മുകളില്‍ പരിഭവം തീര്‍ത്തു.

പിറ്റേന്ന്, പത്തു മണിക്കു തന്നെ അപ്‌ഫന്‍ തിരുമേനി, വെളുത്ത ജുബ്ബയും മുണ്ടും ധരിച്ച് പ്രിന്‍സിപ്പാളിന്റെ ഓഫീസിനു മുന്നിലെത്തി. അദ്ദേഹത്തിന്റെ ആത്മാര്‍ത്ഥതയെ തലേന്നു ചോദ്യം ചെയ്തത് ബുദ്ധിമോശമായിപ്പോയെന്നു തോന്നിയെങ്കിലും, സാരമില്ല, കാശുകൊടുത്തിട്ടല്ലേ, കൊടുത്തതിനു മാത്രമൊന്നും പറഞ്ഞില്ലല്ലോയെന്നൊക്കെ കമല ഓര്‍ക്കുകയുമുണ്ടായി. ഭവ്യതയോടെ മേഡത്തിന്റെ മുമ്പിലിരുന്ന് കാളപൂട്ട്, മുഞ്ഞ, മണ്ഡരി, പന്നിയൂര്‍ വണ്‍ എന്നീ ഗഹനങ്ങളായ വിഷയങ്ങളെപ്പറ്റി അപ്‌ഫന്‍ ആധികാരികമായി ഉപന്യസിക്കുന്നതിന്നിടെ,‍ കൃഷിക്കിടയില്‍ വിളിച്ചുവരുത്തേണ്ടി വന്നതില്‍ പ്രിന്‍സിപ്പാള്‍ ഖേദപ്രകടനം നടത്തുന്നതു കൂടി കണ്ടപ്പോള്‍ കമലയുടെ കണ്ണു നിറഞ്ഞുപോയി. പിതൃതുല്യമായ വാത്സല്യം അങ്ങേരോടു തോന്നുകയും ചെയ്തു.

രക്ഷിതാവിനെ വളരെയേറെ ഇഷ്ടപ്പെട്ടുപോയ പ്രിന്‍സിപ്പാള്‍ , ഉപസംഹാരത്തിനു മുമ്പ്, വെറുതെ തമാശയ്ക്ക്, ഇതൊന്നു നോക്കൂ, മോന്റെ വിക്രസുകള്‍ ഇതൊക്കെയാണു കേട്ടോ, ഇനി ഞാന്‍ നോക്കിക്കോളാം എന്നൊക്കെ പറയുകയും പരാതിപ്പുസ്തകം നാട്യമുനിയുടെ മുന്നിലേക്കു നിരക്കി വയ്ക്കുകയും ചെയ്തു. സീറ്റില്‍നിന്നുവിട്ട്, പഞ്ചപുച്ഛമടക്കി, വാലു താഴ്ത്തി നിന്ന കമലയെ ഒന്നു പാളി നോക്കിയ പിതാജി ഒട്ടുനേരം ചിന്താവിഷ്ടനായി കാണപ്പെട്ടുവെങ്കിലും പക്ഷേ, പരാതി വായിച്ചയുടനെ എഴുന്നേല്‍ക്കുകയും കമലയുടെ അടുത്തേക്കു നടക്കുകയുമാണ് ചെയ്തത്.

വിശിഷ്ടസേവാ മെഡല്‍ ഗവര്‍ണ്ണറില്‍ നിന്നും ഏറ്റുവാങ്ങാന്‍ നെഞ്ചും വിരിച്ചു നില്‍ക്കുന്ന പോലീസുകാരനെപ്പോലെ ഗമയില്‍ കണ്ണുമടച്ചു നിന്ന കമല, പക്ഷേ, സ്വപ്നത്തില്‍ വെടികൊണ്ട പട്ടാളക്കാരന്റെ അവസ്ഥയിലായിപ്പോയെന്നു പറഞ്ഞാല്‍ മതിയല്ലോ. പുച്ഛം, കരാര്‍ അടങ്കല്‍ത്തുകയില്‍ വന്ന കുറവ്, മെഡിക്കല്‍ എത്തിക്സ്, മെനക്കേട്, മിസല്യേനസ് തുടങ്ങിയവ എല്ലാം കൂടി ചേര്‍ത്ത്, ' പ്‌ഫ, പന്നീ, ഇതിനാണോടാ നിന്നെ ഞാന്‍ ഇത്രയും കാശു ചെലവാക്കി മെഡിക്കല്‍ കോളേജിലേക്കു പഠിക്കാന്‍ വിട്ടത്‌ ' എന്നുമാക്രോശിച്ചു കൊണ്ട് അതുല്യ നടന്‍ ഒറ്റ പൊട്ടീരാണ്‌....
.................
"ട്ഠപ്പേ!"

കമല കഥകള്‍ : വാല്യം ഏഴ്

2008-08-09T09:38:00.000+05:30

കോര്‍പ്പറേഷന്റെ ഉന്തുവണ്ടിയില്‍ തള്ളിക്കൊണ്ടുവന്ന്‌ കൊട്ടത്തേങ്ങ തട്ടിന്‍പുറത്തേക്കെന്നപോലെ കഡാവര്‍ റൂമിലേക്കു വലിച്ചെറിയപ്പെട്ടതും എണ്ണത്തോണിയില്‍ക്കിടന്നു ഇരുത്തം വന്നതുമായ ബോഡി, വിരല്‍ കൊണ്ടു ഞോണ്ടി നീക്കിയ പ്രൊഫസ്സര്‍ , ' ലെറ്റ് സൈലെന്‍സ് ബിഗിന്‍ , ലെറ്റ് ലാഫ്റ്റര്‍ ഫ്ലീ ' മാങ്ങാത്തൊലി, മണ്ണാങ്കട്ട എന്നൊക്കെ വലിയ വായില്‍ പറയുന്നതു കേട്ടപ്പോള്‍ കമലക്കു കോട്ടു വാ വന്നു. വന്നതും പോയതും പ്രൊഫസര്‍ അറിയുകയും ചെയ്തു. തൂണും ചാരി നിന്നു കമ്പി വലയിട്ട ജനലിലൂടെ പുറത്തേക്കു നോക്കി നിലകൊണ്ട കമലമനസ്സില്‍ കളങ്കം ലവലേശമില്ലായിരുന്നു. അതേക്കുറിച്ചുള്ള പഴഞ്ചൊല്ലുകളുടെ കഥ വേറെ വരുന്നുണ്ട്.

അലക്കിത്തേച്ച പുത്തന്‍ കോട്ട്‌ ചന്തിക്കടിയില്‍ ഞെരിയാതിരിക്കാന്‍ ഒന്നുപൊക്കി, നാണിത്തള്ള മീന്‍ കുട്ടയുമായി ചന്തയില്‍ ഇരിക്കുന്ന പോലെ, കമല ഉപവിഷ്ഠനായിരിക്കുകയായിരുന്നു. ക്യാമ്പസിലുള്ള കാക്കകളുടെ കലപില പോരാഞ്ഞ്, ഒന്നാം ക്ലാസ്സുകാര്‍ അനാട്ടമി ഹാളിനകത്തും നഗ്നരായി കിടക്കുന്ന കഡാവറുകളെ അവജ്ഞയോടെ‍ നോക്കി, ഗ്വാ ഗ്വാ മുഴക്കിക്കൊണ്ടിരിക്കേയാണു പ്രൊഫസര്‍ പരിവാര സമേതം എഴുന്നള്ളുന്നത്. ഉല്‍സവപ്പറമ്പില്‍ പൊരിയും ഹല്‍വയും വില്‍ക്കാന്‍ നിരത്തിയ പെട്ടിവണ്ടികള്‍ കണക്കേയായിരുന്നു ടേബിളുകളും അതിനു ചുറ്റും പിള്ളേരും. കിഴക്കു നിന്നും പടിഞ്ഞാട്ടേക്കു മേശകള്‍ താണ്ടി സംഘപരിവാരന്‍ നടന്നു നീങ്ങിയപ്പോള്‍ , തിടമ്പെഴുന്നള്ളിക്കുമ്പോള്‍ പുരുഷാരം ഉറഞ്ഞു തുള്ളി ഗോയ്‌ന്ദ ഗോയിന്ദ വിളിക്കുന്നതു പോലെ അമറാനാണു കമലക്കു തോന്നിയത്.

അറ്റെന്‍ഡന്‍സ് എടുത്ത് കഴിഞ്ഞ് മാഷമ്മാരും ടീച്ചര്‍മാരും ഓരോരോ ബോഡിയിലേക്കു ചേക്കേറിയപ്പോള്‍ ഒരു നിയോഗം പോലെ കമലയുടെ ജീവിതത്തിലേക്കു കേറി വന്നത് കുടമാളൂരുകാരന്‍ ഉല്പലാക്ഷന്‍ സാറായിരുന്നു. അറം പറ്റിയ പോലുള്ള ആ സംഭവത്തിന്റെ വിശദാംശങ്ങളിലേക്ക്‌: ‍

ഉല്പലാക്ഷന്‍ സാറ്‌ കല്യാണം കഴിക്കാതെ തന്നെ വിഭാര്യനായ ഒരു വിശാരദനായിരുന്നു. താരന്‍ പെറുക്കി മാറ്റിയ മുടി ഒരു ഭംഗിയുമില്ലാതെ കോതിക്കെട്ടിയും അനാഗത ശ്മശ്രുവെന്നു പോലും വിളിക്കാന്‍ പറ്റാത്ത താടിരോമങ്ങളില്‍ത്തേച്ച എണ്ണ ഉഴിഞ്ഞുമിനുക്കിയും, പായല്‍ പിടിച്ച പല്ലുകളില്‍ ദ്രുത താളം വായിച്ചുമൊക്കെ, പാതി വെന്ത ചക്കക്കുരു ചവക്കും പോലെ സാറ് ഓരോരോ നാട്ടുവര്‍ത്തമാനങ്ങള്‍ പറഞ്ഞ് കുട്ടികളെ കയ്യിലെടുത്തപ്പോള്‍ ‌ ലവനാളു തരക്കേടില്ലെന്നു കമലയ്ക്കു തോന്നി. പെമ്പിള്ളേരെയും വിശിഷ്യാ കമലയെയും കടാക്ഷിച്ചു നടത്തിയ വായ്ത്താരി, ചില സന്ദര്‍ഭങ്ങളില്‍ പിടുത്തം വിട്ടപ്പോള്‍ ലാടനാണോയെന്ന ശങ്ക തോന്നുമായിരുന്നെങ്കിലും, ആകെക്കൂടി അന്ന്‌ ഉല്പു വിളയാടിയ ദിവസം ആയിരുന്നു. അദ്ദേഹം ജീവിതത്തില്‍ അര്‍മ്മാദിച്ച ഏക സന്ദര്‍ഭവും ഇനി വരാന്‍ പോകുന്നതു തന്നെയായിരുന്നിരിക്കണം..

വര്‍ത്തമാനം കഴിഞ്ഞ് പല ടേബിളുകളിലും അപ്പോഴേക്കും കയ്യാങ്കളി തുടങ്ങിയിട്ടുണ്ടായിരുന്നു. ആയുര്‍ വേദത്തിന്റെയും ഹോമോയിയോയുടെയുമൊക്കെ കളരികളില്‍ തുളുനാടന്‍ ശൈലി പയറ്റി വന്നവര്‍ , പുളപ്പ് കാണിക്കാന്‍ വേണ്ടി കഡാവറുകളെ അമ്പത്താറിനിടക്ക് ചീട്ടു മലര്‍ത്തും പോലെ പെരുമാറി ഷൈനിക്കുന്നുമുണ്ടായിരുന്നു. പണ്ട് പഴയ മൂര്‍ഖന്‌ അനുഭവഭേദ്യമായ ഫോര്‍മാലിന്റെ മണം കാരണമാണോ എന്നറിയില്ലെങ്കില്‍ കൂടിയും, ആരാധന നിറഞ്ഞൊഴുകുന്ന കണ്ണുകളിലൂടെ പിടകള്‍ ചേകവന്മാരെ നോക്കി ശ്രൃംഗരിക്കുന്നത് കമല അസ്വസ്ഥ മനസ്സോടെ കാണുകയുണ്ടായി. തിളങ്ങിയേ ഒക്കൂ എന്നു മനസ്സില്‍ കരുതുകയും ചെയ്തു.

ഉല്പു തുടങ്ങിയിട്ടേ ഉണ്ടായിരുന്നുള്ളൂ. ഇരുന്ന സ്റ്റൂളില്‍ നിന്നും നിരങ്ങിയിറങ്ങി അദ്ദേഹം, അടുപ്പിനടുത്ത് പൂച്ചകളെന്ന പോലെ ദൂരെ മാറിയിരിക്കുന്ന ഒന്നാം ക്ലാസുകാരുടെ ശ്രദ്ധ, മലര്‍ന്നു കിടക്കുന്ന ബോഡിയിലേക്കു ക്ഷണിച്ചു. പുഞ്ചപ്പാടത്ത് നടാന്‍ കൊണ്ടുവച്ച ഞാറ്‌ വരമ്പിന്റെ ഇരുവശത്തുമെന്ന കണക്കെ, ടേബിളിനു ചുറ്റും ഡിസെക്‌ഷന്‍ പഠിക്കാന്‍ ഫസ്റ്റ് ഇയര്‍ പൈതങ്ങള്‍‍ തിക്കിത്തിരക്കി. തിരക്കു തീരെ പ്രതീക്ഷിക്കാത്തതു കൊണ്ടു പകച്ചു പോയ കമല, തൃശൂര്‍ പൂരത്തിനു അമിട്ടു പൊട്ടുമ്പോള്‍ ജനം ആയുമ്പോള്‍ കൂടെയെന്നതുപോലെ, തന്നാലാവുന്ന വിധം ചാഞ്ഞു നോക്കി. സൈക്കിളില്‍നിന്നു വീഴുമ്പോള്‍ ബാലന്‍സ് പിടിക്കാന്‍ സര്‍വ്വേക്കല്ലിലേക്കെന്ന പോലെ ഒരു സ്റ്റൂളില്‍ കാലു വച്ചു നോക്കിയപ്പോള്‍ അതു മറിഞ്ഞുവീണുവെങ്കിലും കമല അഡ്ജസ്റ്റ് ചെയ്തു മാനം കാത്തു. ഒരു കഥ അങ്ങനെ ക്ലബ്ബിനു നഷ്ടമാവുകയും ചെയ്തു.

ജഡമല്ലെന്നും, മാനവരാശിയുടെ ഉന്നമനത്തിനു്‌ വൈദ്യ ശാസ്ത്രപുരോഗതിക്കായി സ്വശരീരം വിട്ടുകൊടുത്ത ഏതോ പുണ്യാത്മാവിന്റെ ജീവസ്സുറ്റ ജീവിതമാണു മുന്നില്‍ക്കിടക്കുന്നതുമെന്നൊക്കെ ഉല്പു പറഞ്ഞപ്പോള്‍ മെഡിസിന്‍ പഠിക്കാന്‍ ഭാഗ്യം സിദ്ധിച്ചതില്‍ കമലയ്ക്കു്‌ അഭിമാനം തോന്നി. വളര്‍ന്നു വലുതാകുമ്പോള്‍ കണ്ടുപിടിക്കേണ്ട ഇന്‍വെന്‍ഷനുകളുടെ ഒരു ലിസ്റ്റും പുള്ളി മനസ്സിലോര്‍ത്തു.

ഉല്പു തുടര്‍ന്നു: "കുട്ടികളേ, അനാട്ടമി പഠിക്കുമ്പോള്‍ രണ്ടേ രണ്ടു കാര്യങ്ങളിലാണു മനസ്സിരുത്തേണ്ടത്. അതില്‍ ഒന്നാമത്തേത്, കഡാവര്‍ കണ്ടു നിങ്ങള്‍ ഭയപ്പെടരുത്. അമ്പരക്കരുത് തന്നെയുമല്ല, കോഞ്ഞാട്ട കളിക്കുകയുമരുത്. കാരണം മുകളില്‍ പറഞ്ഞതു തന്നെ. ആദ്യപടിയായി നമുക്കീ ശരീരം തൊട്ടുനോക്കിക്കൊണ്ടു തന്നെ തുടങ്ങാം. എല്ലാവരും വരൂ.."

പക്ഷേ ഒരുത്തനും അനങ്ങിയില്ല, വാഴയ്ക്ക് താങ്ങു വച്ച ശീമക്കൊന്നക്കമ്പു പോലെ, സകലകലാ വല്ലഭന്മാര്‍ ബലം പിടിച്ചിരുന്നു. വിടര്‍ന്ന കണ്ണുകളുമായി ഉല്പുവിനെത്തന്നെ നോക്കിക്കൊണ്ടു നിന്ന ഒരു തരുണിയാവട്ടെ, കാണെക്കാണെ മുഖത്ത് നിറയെ വിയര്‍പ്പു പൊടിഞ്ഞ്, കൈകാലുകള്‍ തളര്‍ന്ന്, കൂട്ടുകാരിയുടെ തോളിലേക്കു ചാഞ്ഞു. കമലക്കതു തീരെ ഇഷ്ടപ്പെട്ടില്ല, അബലകളായ ഇവറ്റകള്‍ എന്തിനിങ്ങോട്ട് കെട്ടിയെടുത്തുവെന്നു വരെ തോന്നിപ്പോയി. ക്രൈസിസ് മാനേജു ചെയ്തു കഴിഞ്ഞ് ഉല്പു കുട്ടികള്‍ക്കു ധൈര്യം പകരാനായി ആദ്യത്തെ പ്രസ്താവനയുടെ പ്രാക്റ്റിക്കല്‍ ഡെമോയിലേക്കു തിരിഞ്ഞു. കഡാവറിന്റെ മൂക്കില്‍ വിരലിട്ടു ഉല്പലാക്ഷന്‍ സാര്‍ തന്റെ നാക്കില്‍ തേച്ചുകൊണ്ട് പ്രസ്താവിച്ചു. " ഭയപ്പെടരുത്, അമ്പരക്കരുത്, കോഞ്ഞാട്ട കളിക്കുകയുമരുത്. ഞാന്‍ ചെയ്തതുപോലെ ചെയ്യാന്‍ കഴിവും ധൈര്യവും ഇക്കൂട്ടത്തില്‍ ആര്‍ക്കുണ്ട്? "

എല്ലാവരും ഭയന്നു പിന്മാറി. ബൈബിള്‍ സിനിമയില്‍ മോസസ് വടിയുയര്‍ത്തിക്കാണിക്കുമ്പോള്‍ കടല്‍ പിളര്‍ന്നു മാറിയ പോലെ കമലയ്ക്കായി എല്ലാവരും ഒഴിഞ്ഞു കൊടുത്തു. പ്രീഡിഗ്രിക്കാലത്ത് സുവോളജി ലാബില്‍ പിത്തു ചെയ്ത തവളയെ വീട്ടില്‍ക്കൊണ്ടു പോയി കാലു വറുത്തുതിന്ന പാരമ്പര്യമുള്ള കമല കൈ ചുരുട്ടിക്കേറ്റി മുന്നോട്ടു വന്നു. ആര്‍പ്പുവിളികളില്ലെങ്കിലും കുരവയുടെ അകമ്പടിയില്ലെങ്കിലും ക്ലബ്ബിന്റെ അഭിമാന ഭാജനമായി ഭാവിയില്‍ മാറേണ്ട കമല ധീരമായി ആ കൃത്യം നിര്‍വഹിച്ചു. നിലത്തു വീണ പത്തുപൈസാത്തുട്ട് കുനിഞ്ഞെടുക്കാന്‍ തുനിഞ്ഞ ബെന്‍സ് വാസുവിനെപ്പോലെ, ആശിര്‍വാദങ്ങള്‍ക്കായി കമല കുനിഞ്ഞു നില്‍ക്കേ ഇടിവെട്ടും പോലെ ഉല്പലാക്ഷന്‍ അലറി : "ഇനി രണ്ടാമത്തെ പാഠം: ഏകാഗ്രത...! നോക്കൂ, ഞാന്‍ ചൂണ്ടുവിരല്‍ മൂക്കിലും മോതിര വിരല്‍ വായിലും വച്ചു. നമ്മുടെ മിടുക്കന്‍ ‍, എന്താ മോന്റെ പേരു്‌, ങ്ഹാ, കമല, തങ്കക്കുടം ഇപ്പോള്‍ ചെയ്തതു നിങ്ങള്‍ കണ്ടു കാണുമല്ലോ? ശ്രദ്ധയോടെ, ഏകാഗ്രതയോടെ വേണം നിങ്ങള്‍ അനാട്ടമി...." ബാക്കിയൊന്നും കേള്‍ക്കാന്‍ നില്‍ക്കാതെ, വെട്ടിയിട്ട വാഴ വീഴുമ്പോലെ, ഒരിരമ്പലോടെ കമല.

അനാട്ടമി പഠനം കഴിഞ്ഞ്‌ അന്നു വീണതാണു ക‍മല.
ക്ലബ്ബിന്റെ ശിലാസ്ഥാപനം അവിടെ നടന്നു. അങ്ങനെ.

കമല കഥകള്‍ - വാല്യം മൂന്ന്

2008-07-24T10:39:00.003+05:30

അക്കൊല്ലമാണ്‌ സ്പോട്ടിങ്ങിനു വെക്കാന്‍ ഫോറന്‍സിക് ഡിപാര്‍ട്മെന്റിന്‌ അഞ്ചടി അഞ്ചിഞ്ച് നീളമുള്ള ഒരു എട്ടടിവീരനെ കിട്ടുന്നത്. പാതിരാ നേരത്ത്‌ ടോര്‍ച്ചെടുക്കാന്‍ നേരം കിട്ടാതെ പറമ്പിലേക്ക്‌ ഓടേണ്ടി വന്ന ഏതോ ഹതഭാഗ്യന്റെ കാലില്‍ ചുറ്റി വരിഞ്ഞ നിലയിലായിരുന്നു ടിയാന്റെ എഴുന്നള്ളത്ത്. കെട്ടിയ കാലുമായി ഹന്ത ഭാഗ്യവാന്‍ ട്രോളിയില്‍ നേരെ ഓര്‍ത്തോ കാഷ്വാല്‍റ്റിയില്‍ ചെന്നു പെട്ട്, എക്സ്-റേയുമെടുത്തു വന്നപ്പോഴേക്കും ടോട്ടല്‍ സ്പെസിമന്റെ എണ്ണമങ്ങ് കൂടി: അനാട്ടമിയില്‍ കുട്ടിവേതാളങ്ങള്‍ക്കു കീറിപ്പഠിക്കാന്‍ ഒരു ബോഡിയും, ലാബിലേക്കായൊരു ഫുള്‍ ബോട്ടില്‍ പാമ്പും! ലവനെ വെറുതെയല്ല കന്നഡത്തില്‍ 'കട്ടിഗെ ഹാവു' എന്നും തെലുങ്കില്‍ 'കട്ട് ലെ പാമൂ' എന്നും പറയുന്നതെന്ന് ഓമനക്കുട്ടന്‍ വെറുതേ ഓര്‍ത്തു.

ലാബിലെ ജാറുകളില്‍ത്തപ്പി, അധ:ക്രൃതനായ ഒരു ചേരയെ കുപ്പിയില്‍ നിന്നും കുടഞ്ഞു കളഞ്ഞു ഫോര്‍മാലിന്‍ നിറക്കുന്നതിനിടക്കാണ്‌ ബംഗാരുവിന്റെ ജനിതക ഘടനയിലേക്ക്‌ ഓമനക്കുട്ടന്റെ ഓര്‍മ്മ പാളിയത്. അന്നാള്‍ വരെ ലാബിലെ റാക്കുകളിലൊന്നില്‍ ഒരു രാജവെമ്പാലയെപ്പൊലെ വിരാജിച്ചിരുന്ന ചേരന്‍ , വീരേന്ദ്രന്റെ ആകസ്മികമായ ആഗമനത്തില്‍ മനം നൊന്ത്, എണ്ണത്തോണിയില്‍ ചുരുണ്ടു കിടന്ന്‌, മഹാകവി ബാബു ആന്റണിയുടെ ഞാനപ്പാനയിലെ രണ്ടു വരികള്‍ ഗദ്ഗദത്തിന്റെ കൂടെ വിഴുങ്ങുകയും ചെയ്തു. വീരശൂര പരാക്രമിയും സര്‍വ്വോപരി താന്തോന്നിയുമായി, വാളുവെച്ച പോലെ കിടക്കുന്ന പാമ്പനെ നോക്കി, ഫോര്‍മാലിന്റെ മണത്തില്‍ ദ്വാരങ്ങള്‍ എരിയുന്നതു വകവെക്കാതെ, ഓമനക്കുട്ടന്‍ സംസ്ക്രൃതവും പറഞ്ഞിരുന്നുവെന്നത് ചരിത്രത്തില്‍ രേഖപ്പെടുത്തിയിരുന്നുവെന്നതു വേറെ.

പക്ഷേ, നമ്മുടെ പ്രതിപാദ്യ വിഷയം അതൊന്നുമല്ലല്ലോ!

പരീക്ഷയാണ്‌, പഠിച്ചതോ ഇല്ല, ഇനിയിപ്പോള്‍ ദൈവം തമ്പുരാനോട്‌ അഭ്യര്‍ത്ഥിക്കാത്തതിന്റെ പേരിലെങ്ങാനും പാസ്സാവാതിരിക്കേണ്ട എന്നു കരുതി അതിരാവിലെ ഏഴരമണിക്കെണീറ്റ് കമല അമ്പലത്തിലോട്ടു പോയി. നീലത്തെ കണ്ടു, ഭസ്മവും പൂശി എന്നല്ലാതെ, പോയ കാര്യമൊട്ടു നടന്നതുമില്ല, ഒരു അമ്പലക്കാളയെപ്പൊലെ നടക്കു ചുറ്റും മണ്ടി നടന്നു എന്നു മാത്രം. അനാട്ടമി ഓറലിനു ലീലാമ്മയുടെ മുമ്പില്‍ ചെന്നു പെട്ട പോലെ , വെറുതെ നേരം കളഞ്ഞു, കമല തിരിയെപ്പോന്നു.

പത്തു മണിയടുപ്പിച്ച് കമലയുടെ പിന്നില്‍ അണികളെപ്പോലെ ഞങ്ങളെല്ലാം ഡിപാര്‍ട്മെന്റിലെത്തി. പോലീസ് സ്റ്റേഷനില്‍ ഒപ്പിടാന്‍ ചെന്ന പോക്കറ്റടിക്കാരെപ്പോലെ ഭവ്യതയോടെ ലാബിനു പുറത്തു തൊഴുതു നിന്നു. ഇതെത്ര കണ്ടിരിക്കുന്നു, ഇനിയെത്ര കാണാന്‍ കിടക്കുന്നു എന്നുള്ള മട്ടില്‍ പുല്ലും ചവച്ചോണ്ടു ഞങ്ങള്‍ അവിടെ പരിലസിച്ചപ്പോള്‍ , കമലയാവട്ടെ ഉള്ളില്‍ നടക്കാന്‍ പോവുന്ന കാര്യത്തെക്കുറിച്ചു നല്ല നിശ്ചയമുള്ളതു പോലെ, കൈരളി ടിവിക്കു ഇന്റര്‍വ്യു കൊടുക്കുന്ന നിഷ്കാമ കര്‍മയോഗിയെപ്പോലെ ചകിതനായും പിടിവിട്ടു പോയവനെപ്പോലെയും കാണപ്പെട്ടു.

പരീക്ഷ തുടങ്ങിയതോ തീര്‍ന്നതോ ഒന്നും ഞങ്ങളാരും അറിഞ്ഞില്ല; നോട്ടം അത്രയ്ക്കു വൈഡ് സ്ക്രീന്‍ മോഡിലായിരുന്നു. ഈരണ്ടു മിനുട്ടു വീതമുള്ള സ്പോട്ടറുകള്‍ക്കു മുമ്പില്‍ ചെന്ന്‌ പേനകുടഞ്ഞും പെന്‍സില്‍ കൂര്‍പ്പിച്ചും റബ്ബര്‍ മണത്തു നോക്കിയുമെല്ലാം ഞങ്ങള്‍ ബുദ്ധിയും ബുദ്ധിമുട്ടും അഭിനയിക്കുകയുണ്ടായി. സ്റ്റേഷന്‍ എത്താറാവുമ്പോള്‍ കക്കൂസിനു മുന്നില്‍ തിക്കിത്തിരക്കുന്ന ട്രെയിന്‍ യാത്രികരെപ്പോലെ എല്ലാവരും ലാബില്‍ പറന്നു നടന്നു. യാതൊരു വൈഷമ്യവും കൂടാതെ അങ്ങനെ ആ പരീക്ഷയും ഞങ്ങള്‍ വിജയിപ്പിച്ചു. സ്പെസിമനെക്കുറിച്ചും സമയം തികയാത്തതിനെക്കുറിച്ചും ബെല്ലടിച്ചത് കേള്‍ക്കാത്തതിനു പ്യൂണിനെ ശകാരിച്ചുമൊക്കെ പഠിപ്പിസ്റ്റുകള്‍ ഘോരഘോരം വായ്ത്താരി മുഴക്കുമ്പോള്‍ , ഞങ്ങളിറങ്ങി നേരെ മെസ്സിലോട്ടു വിട്ടു. മുഴുപ്പുള്ള മീന്‍ വിളമ്പിയ പാത്രങ്ങള്‍ തെരഞ്ഞു പിടിച്ച് 'ഏറ്റെടുത്ത വര്‍ക്ക് ' ശുഷ്കാന്തിയോടെ തുടങ്ങുകയും ചെയ്തു.

എന്നാല്‍ അമൃതേത്ത് കഴിഞ്ഞതോടെ സംഗതികള്‍ ആകെ മാറി. കൊന്നാലും വൈവക്കു പോകില്ലെന്ന് പ്രഖ്യാപിച്ച് കമല കട്ടിലില്‍ ചക്കവെട്ടിയിട്ട പോലെ കിടന്നു. അത്രയിടം വരെ വന്നു തന്നാല്‍ മതി, തിരിയെപ്പോരുമ്പോള്‍ കോഫീ ഹൗസില്‍ ഉണ്ടമ്പൊരി റെഡിയായിട്ടുണ്ടാവും, കഴിച്ചേച്ച് പോരാവുന്നതല്ലേയുള്ളൂ തുടങ്ങിയ പ്രലോഭനങ്ങള്‍‍ക്കൊന്നും കമലയുടെ പിഞ്ചു മനസ്സിനെ ചലനം കൊള്ളിക്കാന്‍ ആയില്ല.

ഒടുക്കം ഉച്ചയ്ക്ക്, വിഷണ്ണരായ മാടുകള്‍ ലോറിക്കു പിന്നില്‍ നിരന്നു നില്‍ക്കുന്ന പോലെ കമലയില്ലാതെ ഞങ്ങള്‍ പരീക്ഷാ ഹാളിനു വെളിയില്‍ കുന്തിച്ചിരുന്നു കോട്ടുവായിട്ടു.

അന്നൊക്കെ മാഷന്മാര്‍ വൈവകള്‍ക്കിടയിലാണ്‌ ഉത്തര പേപ്പര്‍ നോക്കാറുണ്ടായിരുന്നത്‌. ചിരിച്ചും കളിച്ചും ടീച്ചര്‍മാരോടു ശ്രൃംഗരിച്ചുമൊക്കെ കുഴമ്പു പരുവത്തിലാണ്‌ മാര്‍ക്കൊക്കെ വീഴാറ്. പങ്കെടുക്കുക, വിജയിപ്പിക്കുക എന്നതാണു കമല ക്ലബ്ബിന്റെ മുദ്രാവാക്യമെന്നതിനാല്‍ തീരെ താല്പര്യമില്ലെങ്കില്‍ കൂടിയും, തല ചൊറിഞ്ഞും മുഖം വക്രിച്ചും തൂവാലയെടുത്തു നെറ്റി കൂടെക്കൂടെ തുടച്ചും, ഓറലിനു അനുവര്‍ത്തിക്കാനുള്ള ടാക്റ്റിക്സ് ഞങ്ങള്‍ റിഹേഴ്സല്‍ ചെയ്തു. അങ്ങനെ ഉള്ളിലേക്കു ചെല്ലാനുള്ള ഉള്‍വിളിയും കാത്തു ഞങ്ങള്‍ കെട്ടിക്കിടക്കുമ്പോഴാണു അകത്തു നിന്നും മാഷന്മാര്‍ അലറിച്ചിരിക്കുന്നതു കേള്‍ക്കുന്നത്‌. ചിരിച്ചു ചിരിച്ചു ടീച്ചര്‍മാര്‍ ചക്ക കുഴയുന്നപോലെ കുഴയുന്നതു കണ്ടപ്പോള്‍ ഏകദേശ രൂപം പിടികിട്ടിയെങ്കിലും പരസ്പരം മുഖത്തു നോക്കാതെ ചക്രവാള്‍ ലക്ഷ്യമാക്കി നോട്ടമയക്കുകയാണു, ഒറ്റയെണ്ണം ഒഴിവാവാതെ, എല്ലാവരും ചെയ്തത്‌.

ഒരു തലതെറിച്ച പരീക്ഷകന്‍ ഇറങ്ങി വന്ന്‌ ഉത്തരക്കടലാസു പൊക്കിക്കാണിച്ച് പേപ്പര്‍ ആരുടേതാണെന്നു ചോദിച്ചപ്പോള്‍ നിഷ്കളങ്കരായ വഴിപോക്കരേപ്പോലെ ഞങ്ങള്‍ ഇളിച്ചു നിന്നു.

പക്ഷേ സംഗതി മനസ്സിലായപ്പോള്‍ എല്ലാവരും ഒന്നുഷാറായി.
കമല ക്ലബ് ആ പ്രശ്നം അവിടെ വച്ചു തന്നെ ഏറ്റെടുത്തു.

കാര്യം, സ്പോട്ടിങ്ങിനു നമ്മുടെ വീരപ്പനെ വച്ചിരുന്നതു കണ്ടപ്പോള്‍ ഉത്തര കര്‍ത്താവിനു സംഗതി പിടികിട്ടി, സാധനം പാമ്പു തന്നെ. വര്‍ഗ്ഗീയ വിഷം വമിക്കുന്ന ഏതോ ഉഗ്രവാദിയാണു ടിയാന്‍ എന്നും അദ്ദേഹം ഊഹിച്ചു. എത്ര ചുഴിഞ്ഞാലോചിച്ചിട്ടും ഐറ്റം എതെന്നു പിടികിട്ടാതെ ആ മാന്യ ദേഹം പക്ഷേ, ഉത്തരക്കടലാസില്‍ ‍, ചുവന്ന മഷിയില്‍ വട്ടം വരച്ചതിനുള്ളില്‍ , എഴുതി വച്ചിരുന്നത്‌ ഇങ്ങനെ ആയിരുന്നു...

M-O-O-R-K-K-A-N........!

ഡിസ്‌ക്ലെയ്‌മര്‍ : പരാമര്‍ശ വിഷയമായ പാമ്പന്‍ , കോബ്ര വിഭാഗത്തില്‍ പെട്ടവനല്ല. എട്ടടിവീരന്‍ , ശംഖുവരയന്‍ എന്നൊക്കെയാണു പ്രശസ്തിയെങ്കിലും പേരില്‍ മാത്രമേ മൂര്‍ഖത്തരം ഉള്ളൂ. ബങ്കാരസ് ജനുസില്‍‌പ്പെട്ടവനും നല്ലനടപ്പുകാരനുമായ ടിയാനെയാണു അദ്ദ്യേം മൂര്‍ഖനായി തെറ്റിദ്ധരിച്ചതും, വിഷമിറക്കി കുപ്പിയിലടച്ചതും. ബ്ലോഗ് വായിച്ചവര്‍ ലവന്റെ ഇംഗ്ലീസ്‌ പരിതാപകരം, ഇതില്‍ തമാശയെന്തോന്നു എന്നൊക്കെക്കരുതി പുച്ഛിച്ചു ചിരിച്ചതായി വാര്‍ത്ത വന്ന സാഹചര്യത്തിലാണു വിശദീകരണം. ഇതിത്ര കഠിനമാവുമെന്ന് കമലയൊട്ടു നിരീച്ചതുമില്ല.

സിദ്ധാന്തം കമലാന്ത്യം.

2008-06-10T11:55:00.000+05:30

കോഴിക്കോട് മെഡിക്കല്‍ കോളേജില്‍

തൊണ്ണൂറുകളുടെ തുടക്കത്തില്‍

മെഡിസിനു ചേര്‍ന്ന്,

താങ്ങാനാവാത്ത

ക്രിയേറ്റിവിറ്റി

അടിപ്പടലയോടെ

തലക്കു പിടിച്ചപ്പോള്‍ ,

വേറൊന്നും

ചെയ്യാനില്ലാത്തതു കൊണ്ട് ‍ ,

ഒരു പണിയായിക്കോട്ടേന്നു കരുതി,

പരദൂഷണ വ്യവസായം

ആരംഭിച്ച

സുമുഖരും

സല്‍സ്വഭാവികളും

തങ്കപ്പെട്ട മനസ്സുള്ളവരുമായ

ഒരുപറ്റം

ബു ദ്ധി രാ ക്ഷ സ ന്മാ ര്‍ !

ക മ ല *)*(* ക്ല ബ്